mánudagur, desember 24, 2007

Gleðileg jól

Elsku bestu vinir og vandamenn sem líta hér inn, ég óska ykkur öllum gleðilegra jóla og farsæls komandi árs.
Ef þú ert ekki búinn að fá kortið sem þú færð alltaf frá mér þá er það enn í pósti og kemur til þín milli jóla og nýárs.
HAFIÐ ÞAÐ GOTT ELSKURNAR

laugardagur, nóvember 17, 2007

Djö.........

Úff þvílíkur dagur, ég þurfti vegna óviðráðanlegra aðstæðna að vinna í dag laugardag frá kl 10 til 22. Og ekki mína vanalegu vinnu heldur þurfti ég að leysa af á Sambýlinu. Jæja allavega veit ég núna meir um starfsemina sem ég stjórna. Góðu fréttirnar eru að ég þarf ekki að vinna þetta sama á morgun, eins og útlit var fyrir.
Svo get ég ekki skrifað á saumaklúbbsbloggsíðuna!!! Drasl allt saman!!!!!!!!!!!
Veðrið var leiðinlegt í dag, snjór og rok, kannski ekki stormur hér en því sem næst.
Helgin er sem sagt önnur en ég hafði planað.

fimmtudagur, nóvember 01, 2007

Mér er ofboðið

Í dag er 1. nóvember og Húsasmiðjan er byrjuð að sýna jólaauglýsingar. Ég þoli þessa auglýsingu ekki, þetta er svo mikil ameríkanisering. Jólasveinn í Kók búningi er eitt, en þessi hugmynd um að það sé eingöngu einn jólasveinn á fljúgandi sleða er allt annar handleggur. Það þarf ekki að troða því inn á börnin. Þetta hlýtur að vera nógu ruglandi samt. Annars vegar eru 13 íslenskir lúðalegir jólasveinar í gamaldags fátæklingafötum sem eiga rauða sparibúninga og hins vegar erlenda fyrirmyndin um 1 jólasvein sem sér allri heimsbyggðinni fyrir gjöfum fljúgandi um á sleða og fer aldrei úr sparifötunum.
Æj ég er mest brjáluð yfir tímasetningunni, 1. nóvember er ekki hægt að bíða fram í miðjan mánuðinn.
Þegar ég var lítil var spennandi að sjá fyrstu jólaútstillinguna í Rammagerðinni og ég man ekki betur en að það hefði aldrei verið fyrr en eftir afmælið mitt, s.s. um miðjan mánuð.
Ég þoli þetta ekki, mér finnast of mikið af jólaauglýsingum, jólalögum og jólastandi allt of snemma hafa eyðilagt jólastemmninguna fyrir mér síðustu ár. Já já ég er bara grumpy Gringe, uss uss.

miðvikudagur, október 24, 2007

Auður Capital

Mikið fannst mér gaman að sjá að heill banki er nefndur eftir mér he he. Verst að ég get þá aldrei fengið lénið http://www.audur.is/.
Kannski dettur mér einhverntímann í hug að sækja um vinnu hjá þeim bara til að fá netfang sem endar á audur.is, eini gallinn er að þetta er banki og ég veit ekki hvað ég ætti að gera þar. Kannski viðskiptafræðingurinn Inga María sæki um vinnu þar, nú eða Linda með sína reynslu úr bankageiranum.

laugardagur, október 20, 2007

Veikindi

Jæja flensuskrattinn virðist hafa náð mér, ég er núna á þriðja degi heima hjá mér. Mér dauðleiðist þetta. Ég hélt ég gæti farið að vinna í dag en svo var ekki. Ég er ákveðin í að fara á morgun.
Ég fékk samstarfskonu mína sem býr í sömu götu og ég til að fara í búðina fyrir mig í gær, ég var náttúrulega búin með mjólkina. Hún var svo væn að bæta við innkaupin nokkrum hlutum sem ég mundi ekki eftir s.s. nammi og hálsbrjóstsykur.
Gamlar minningar komu upp þegar ég tók upp Paló molana, þó að umbúðirnar séu breyttar er bragðið ennþá það sama. Þegar ég var lítil og heimsótti afa minn og ömmu þá fékk ég alltaf Bismark mola hjá ömmu og Paló mola hjá afa. Amma var alltaf að skamma afa fyrir að gefa mér of mikið. Það vantaði bara lyktina af Prince Albert píputóbakinu hans afa.
Annars var ég dugleg í vikunni og dreif mig til læknis og lét taka blóðprufu v. blóðfitunnar og svo líka til að tékka á vítamínum og steinefnum og fleiri hlutum.

miðvikudagur, október 03, 2007

of miklar kröfur til sjálfrar mín ?

Samkvæmt síðustu kommentum geri ég of miklar kröfur til sjálfrar mín, það má svo sem vera að einhverju leiti. Ég ætlaði mér bara að gera eitthvað merkilegra við tímann minn en að hanga yfir sjónvarpinu öll kvöld og komst að því að sjónvarpið togar ennþá meira til mín en námsbækurnar. Ég ætti alveg að geta gert betur, maður á nú að geta gert eitthvað merkilegra við tímann sinn. Ég er ekki að hugsa um börn og halda margra manna heimili, svo ég hef heldur meiri tíma frjálsan en þið og ætti alveg að geta gert eitthvað annað en að glápa á sjónvarpið. Ég held að ég sé bara ekki viðbúin því að stunda sjálfsnám eingöngu, eins og staðan er í dag. Ég eyði það miklum tíma ein með sjálfri mér, ég þarf meiri félagsskap. En í þessu samhengi þá fékk ég niðurstöðurnar úr prófinu í síðustu viku í dag, það gekk alveg ágætlega þó ég hafi nú ekki lesið nema glósurnar, ég fekk heilar 7 úr prófinu. Svo nú ætla ég að reyna þetta áfram út þessa önn.
En mikið langar mig í stutta utanlandsferð núna í haust, ég veit bara ekki hvert og hver vill koma með? Og náttúrulega hvort ég hafi tíma til þess arna grrr. Ég hugsa bara málið áfram.

sunnudagur, september 30, 2007

nóg að gera

Jæja það er nóg að gera í vinnuni og því er ég komin með bakþanka varðandi námið. Ég er ekki alveg að tíma að eyða nægum tíma í námið. Ég skráði mig fyrst í 3 kúrsa þ.e. 9 einingar og minnkaði það svo niður í 2 kúrsa 6 einingar, enda líklega með 3 einingar. Ég er að komast að því að fjarnámsfyrirkomulagið á ekki endilega við mig. Það var próf í vikunni og ég gat bara ekki komið mér í að læra almennilega fyrir það, guð má vita hvað kemur út úr því. Næst er hópverkefni og ég veit ekki hvernig það fer, þá má maður ekki slá slöku við án þess að það komi niður á einhverjum öðrum, bölvað. Ég þarf fólkið í kringum mig, ég er nógu mikið ein með sjálfri mér og þarf frekar að finna mér eitthvað að gera við tímann minn sem hefur eitthvað með annað fólk að gera. Auk þess sem ég þarf bráðnauðsynlega að hreyfa mig meira, nei ég meina ég þarf að hreyfa mig punktur.
Ég þori nú samt ekki alveg að hætta, ég veit ekki ég hef aldrei hætt í neinu svona áður, ég hef kannski fallið á einhverju en ekki hætt bara sí svona. Ég kann ekki að hætta.

laugardagur, september 15, 2007

Umferðarteppur

Mér datt í hug að skrifa um umræðuna um umferðarteppur á höfuðborgarsvæðinu. Það fauk svolítið í mig þegar ég var að hlusta á útvarpið og allir voru á einu máli um að það þyrfti alls kyns umferðarmannvirki til að leysa úr þessu, nú eða að færa miðbæinn að Elliðaárósum. Einhver talaði um að allir skólarnir væru í miðbænum við Tjörnina og það þyrfti að flytja þá. Helvítis vitleysa, þar eru bara tveir af minni framhaldskólum höfuðborgarsvæðisins og auðvitað HÍ, stærstu skólarnir eru nú í úthverfunum eiginlega. Hvað er með Borgó og FB, FG, MK og skólana í Hafnarfirði. Auk þess sem 3 skólar eru staðsettir þar sem "nýr miðbær" átti að verða fyrir 20 árum síðan í nágrenni Kringlunnar. Og svo eru náttúrulega margir skólar á ýmsum öðrum stöðum í bænum.
Í allri umræðunni var ekkert minnst á hegðun fólksins sjálfs, það er orsökin í sjálfu sér. Ef manni verður litið inn í bílana í þessari umferðarteppu þá sér maður að það eru 1-2 í hverjum bíl, sjaldnast fleiri en einn. Ég ætla ekkert að fara frekar út í þessa sálmana, mér finnst bara að þetta sé hluti af umræðunni sem sjaldast kemur fram. Ég varð mjög ánægð með að sjá í það minnsta bloggfærslur þessa efnis. s.s. eins og þessi http://laugardalur.blog.is/blog/laugardalur/entry/307828/
Mér finnst engin ástæða til að endurtaka það sem aðrir hafa þegar komið fram með.

Annað varðandi þetta blogg er að það er á vegum íbúasamtaka í Laugardalnum. Íbúasamtök eru sjaldgæf í Rvk finnst mér, allavega heyrir maður ekki oft af slíkum samtökum. Mér finnst það heillandi að íbúar taki sig saman og geri eitthvað saman til heilla fyrir hverfið sitt. Þó oftast nær eru slík samtök stofnuð í skyndiþörf fyrir að mótmæla einhverju s.s. óæskilegir nágrannar t.d. heimilislausum o.s.frv.
Reyndar finnst mér munur á þessum og á Njálsgötunni vera að hér er verið að berjast fyrir einhverju, þ.e. grænum svæðum, en ekki bara gegn einhverju.

mánudagur, ágúst 27, 2007

hæ hó

Nú er að setja sig í stellingar og skrifa eitthvað þó ekki sé maður endilega í stuði fyrir það, það þýðir ekki að ásaka aðra um að skrifa ekki þegar maður stendur sig ekki sjálfur.
Ég fór í 2 vikna sumarfrí og var á ferðalagi með vinum frá Þýskalandi og má segja að við höfum farið vítt og breitt, nánast allt nema Vestmannaeyjar, firðina og hálendið.
Við gerðum ýmislegt skemmtilegt eins og að fara í siglingu um Breiðafjörð, Flúðasiglingar, Snjósleðaferð og náttúrulega í siglingu um Jökulsárlón. Í þessari ferð urðu til hreint ótrúlega flottar myndir yfir 2000 stykki. Mig langar alveg einstaklega mikið í góða myndavél, ég þarf að afla mér upplýsinga um slík tæki til að vita hvað ég vil. Annars fer að verða minni tími fyrir svoleiðis þegar ég fer að byrja í náminu nú í september. Jæja ég sé til hvernig gengur.

fimmtudagur, ágúst 02, 2007

Upptaka frá færeyjum

Grr var búin að gera fína færslu sem hvarf þegar ég ætlaði að bæta mynd inn á færsluna. En jæja, ég var að hlusta á upptöku frá tónleikum okkar á ráðhúströppunum í færeyjum. Ég verð að segja að þetta tókst bara ágætlega upp þrátt fyrir allar truflanirnar sem ég var alveg búin að gleyma. Fyrst var það fjöllistahópur með eldgleypi og ásláttarhljóðfæri hinu megin við götuna sem truflaði, það heyrist í þeim á upptökunni. Svo kom barasta heil lúðrasveit niður götuna, það var bara ekki hægt að syngja yfir það svo það varð að gera hlé. Þetta var meinfyndið, okkur fannst það hins vegar ekki fyndið að hann skyldi halda að við værum í fiskverkakvenna búningi en ekki hjúkkubúningi. Ég bara skil þetta ekki, hvítir sloppar og kappar, hver skilur ekki hvað það þýðir. En gaman var þetta, ég reyni að skella einni mynd inn með.

miðvikudagur, ágúst 01, 2007

Færeyjar

Jæja þá er maður komin aftur í heim í heiðardalinn eftir að hafa verið á Ólafsvökunni í Færeyjum. Það var einfaldlega æðislega gaman í þessari ferð. Mikið hlegið og mikið gaman, mikil stemmning í hópnum. Ég skemmti mér konunglega þrátt fyrir kvef og magapest að auki.

föstudagur, júlí 27, 2007

Veik

Ég get svo svarið það, það á ekki af mér að ganga, núna er ég með eitt versta kvef sem ég hef fengið í langann tíma og er að fara í söngferðalag með kórnum til færeyja. Heppilegt eða hitt þó!!
Ekki sérlega þegar kórinn er það lítill að það munar um hvern einn og einasta.
Við fljúgum í kvöld og ég er ekki búin að gera allt sem ég ætlaði að gera enda lá ég í bólinu í allan gærdag.
Við fljúgum til baka á þriðjudag svo ekkert verður bloggað þangað til.

mánudagur, júlí 16, 2007

hvur andsk.

Ég var að taka eftir því að myndavélin mín er með ranga dagsetningu, og hver veit hve lengi það hefur staðið. Hvernig á maður þá að finna út hvenær myndirnar voru teknar löngu seinna ef dagsetningin er röng í upphafi, grrrr. Mín ábending til allra tékka á því hvort myndavélin sé rétt stillt.

Heimsókn á Húnavöku

Hér er Alexander Emil Rae (Linduson) að sýna hvað í honum býr, hvað hann er duglegur að skríða. Glitta sést í Björk í bakgrunni.
Posted by Picasa

sunnudagur, júlí 15, 2007

Sunnudagur

Fyrir viku síðan varð ég fyrir undarlegu slysi eins og mér einni er lagið. Á sunnudagsmorgun fór ég í heimsókn til bróður míns og ætlaði ég mér að leggjast í sólina í fína hengirúmið hans þegar kaðallinn höfuðmegin slitnaði og ég datt á bakið. Þetta væri fyndið ef þetta væri ekki svona sárt. Ég varð ekki vör við afleiðingarnar alveg strax en er búin að fást við mikla verki síðan þá. Ég er búin að vera á vöðvaslakandi og hitapokum síðan þá. Ég þarf að drífa mig í sjúkraþjálfun og nudd til að ná þessu helvíti úr mér.
Annars er búið að vera nóg að gera hjá mér, mikill gestagangur og gaman.
Vinkona mín úr Pennanum er að vinna hjá mér í sumarafleysingum í Júlímánuði og býr hjá mér á meðan. Nú og svo kom mamma á fimmtudaginn og verður fram í næstu viku.
Um þessa helgi var Húnavaka, bæjarhátíð Blönduóss. Vegna hennar beint eða óbeint rötuðu Linda og Alexander í heimsókn til mín og hún Björk líka. Seinna komu kallarnir úr torfærunni og fengu líka smá kaffi og vöfflur áður en haldið var aftur heim á leið.
Kórinn minn tók þátt í hátíðarhöldunum bæði með því að vera með borð á flóamarkaði og með því að syngja á kvöldvöku. Mér skilst að atriðið okkar hafi tekist ágætlega. Eftir kvöldvökuna var skroppið aðeins að fá sér einn öl á Pottinum og Pönnuni. Í dag er ég búin að liggja mest í leti enda bakið að drepa mig eftir annasaman laugardag.
og hvað segið þið svo gott??

mánudagur, júlí 09, 2007

Borgin og landið, landið og útlönd

Þegar ég var barn, var ég í þeirri óvenjulegu stöðu að eiga enga að úti á landi eða í útlöndum. Vinkonur mínar fóru með fjölskyldum sínum í ferðalög til að heimsækja ættingjana úti á landi, hvort sem það var Bolungarvík, Vestmannaeyjar, Fáskrúðsfjörður eða Kjósin, austur, vestur, norður eða suður. Ég var bara úr Reykjavík og þar var allt mitt skyldfólk, eins óspennandi og það gat verið. Nokkrar vinkonur áttu kannski ekki heldur, frændfólk á landsbyggðinni en þær áttu þá náskylda ættingja í Noregi, Finnlandi, Danmörku eða Lúxembourg. Ekki var því að sæta hjá mér þá... ekki það að ég hafi ekki fengið að ferðast með foreldrum mínum á skemmtilega staði, og var þá líka öfundsverð af þeim sem heimsóttu ættingja víðsvegar um landið, þær sem ég öfundaði. Jæja svona er maður alltaf öfugsnúinn. En það var nú ekki það sem ég ætlaði mér að fara með þessu. Allavega sem barn var ég ekki með innsýn inn í lífið úti á landi, ekki raunverulega lífið. Það er allt annar hlutur að ferðast með túristum um landið en að búa inni á heimili í heimsókn. Síðar á æfinni fékk ég innsýn inn í raunveruleika lífsins í Svíþjóð og í Þýskalandi. En ég hafði þar til í fyrra ekki búið á stað minni en Reykjavík, ( ef frá er talin dvöl í nokkra mánuði). Sem áður sagði ég hef aldrei átt neina ættingja úti á landi, ég er eins hreinræktaður Reykvíkingur og þeir gerast. Báðir foreldrarnir úr Reykjavík og 3 af 4 foreldrum þeirra og eina ættina er meira að segja hægt að rekja alla vega 7 ættliði aftur til átjándu aldar í búsetu í Reykjavík. Lengra aftur en kaupstaðarréttindi Reykjavíkur. Ég hafði sem sagt aldrei séð út fyrir mölina þar til í fyrra. Af fyrra bragði hefði ég ekki getað ímyndað mér hvað sum fyrirtæki leyfa sér að veita landsbyggðinni lélega þjónustu. Ég var að kaupa þjónustu af Símanum um daginn, ég fékk mér ADSL og sjónvarp í gegnum ADSL. Svo ég fari nú ekki í gegnum þvæluna með að beiðnin barst aldrei og hin eilífu símtöl með að fá þjónustuna í gang. Nema hvað það er ekki fyrr en þjónustan er komin í gang að ég fæ að vita það að ég geti ekki fengið þjónustuna sem ég bað um. Ég pantaði nauðbeygð ( efni í annan pistil, úrval sjónvarpsrása) stærsta pakkann hjá símanum, því það var eina leiðin til að fá þær sjónvarpsrásir sem ég vildi. En því miður það er bara einn pakki í boði fyrir landsbyggðina, ég kváði, það stendur hvergi á heimasíðu símans né heldur á kynningarbæklingunum. Við pöpullinn á landinu verðum að sætta okkur við topp pakkann, sem inniheldur 8 stöðvar, þar af eru 2 sem mér gæti dottið í hug að horfa á. Restin er rugl og rusl. Grrrr þvílíkur dónaskapur, þessi staðreynd er ekki auglýst, í mínum huga er um að ræða vörusvik. En þar sem ekki þarf að taka það fram í auglýsingunni þá geri ég ráð fyrir að þetta sé eitthvað sem maður á að vita, búi maður á landsbyggðinni.

sunnudagur, júlí 08, 2007

Syndaaflausnir 2007

Martin Luther mótmælti syndaflausnum á sínum tíma, flestum samtímamönnum hans fanst ekkert athugavert við það að geta keypt sér syndaaflausn og getað þar með syndgað án samviskubits áfram.
Syndaaflausnir ársins 2007 felast helst í kolefnisjöfnun farartækja og heimstónleikunum Live Earth. Sem samkvæmt fréttum í dag eru alls ekkert svo grænir ef nánar er út í það farið, stjörnurnar ferðast á einkaþotum til að taka þátt í tónleikunum svo ekki sé minnst á ruslið eftir gestina. ...
Tískuorð ársins á íslandi, kolefnisjöfnun .... í mínum huga er það hreinn og beinn brandari.... alls staðar er þessu orði skeytt inn, allir vilja kolefnisjafna bílinn sinn eða flugmiðann sinn. En enginn hugsar um nærtækustu leiðina til umhverfisverndar, neyslujöfnun.... Sannleikurinn er sá að með neyslumynstri vesturlanda höfum við komið okkur í þann vanda sem við erum í dag. Með því að hvert heimili hugsi aðeins betur um neyslumynstur sitt og hvað fer á hauganna frá hverju heimili á hverjum degi þá væri mikið hægt að gera. Ef aðeins er hugsað út í það hversu mikið af nothæfum hlutum lenda í urðun á degi hverjum.. svo sem eins og frá íbúðum þar sem öllu er rutt út til að setja allt nýtt inn a la Innlit/Útlit, o.s.frv. tækninýjungarnar endast okkur aldrei lengi, við verðum að fá meira og nýrra. Raftæki eru ekki lengur byggð til að endast, ekkert má duga langt fram yfir 2 árin sem tækið er í ábyrgð, hver kannast ekki við það að farsíminn endist bara 1 mánuð fram yfir ábyrgðartímann. Þetta minnir mig alltaf á "Brave new world" . Eina leiðin til að halda hagkerfum heimsins gangandi er að við neytum meir og meir. Það er sá vítahringur sem við búum við, kolefnisjöfnun og live earth breyta þar engu um. Það er meiri kolefnisjöfnun fólgin í því að keyra ekki stuttar fjarlægðir og láta bílinn aldrei vera í lausagangi. Meira vit er að ganga út í sjoppu en að keyra þangað, hjóla í ræktina ( það er góð upphitun) frekar en að keyra þangað o.s. frv. en nei það er auðveldara að "kolefnisjafna" og keyra áfram bensínfrekustu bílum jarðar í stuttar vegalengdir innanbæjar.... Heimur versnandi fer og hana nú...

föstudagur, júlí 06, 2007

Ný færsla

Tjah Ásta mín ég hef bara fundið mér annað að gera en að horfa á sjónvarpið eða skrifa á bloggið. Maður tekur pínulítið mið af öðrum, það er hreinlega ekki mikið skrifað svona yfir hásumarið, almennt séð svona. Maður bara er ekkert að nenna þessu ef sólin skín. Ekki það að ég hafi haft tíma til að fara út í sólina.
Það er meir en nóg að gera í vinnuni og finnst mér það ekkert þægilegt að allir aðrir hérna hjá mér séu í sumarfríi.
Mig langar í sumarfrí núna.....
En jæja... það bíður.

Mig hlakkar til að fara heim um helgina, kýkja aðeins í sund kannski, finna sér eitthvað skemmtilegt að gera.
Næstu helgi er svo nóg að gera hér...

föstudagur, júní 29, 2007

Eitt og annað

Fyrst sjónvarpið er frekar lélegt í augnarblikinu og ég er of löt til að gera eitthvað af viti sem stendur þá skrifa ég nokkrar línur hér.
Það er ansi leiðilegt að vera ein á skrifstofunni þessa dagana, enda eru allir aðrir í fríi sem stendur. Úff ég lifi það af.
Það er nóg að gera í vinnuni og ætla ég því ekki í bæinn þessa helgina eins og undanfarnar 3 helgar. Heldur vinna eitthvað í þeim verkefnum sem bíða.
Bíllinn var líka í viðgerð og var ég ekki viss um að fá hann aftur í dag. Hann fer svo aftur á verkstæði á miðvikudaginni, ekkert alvarlegt bara eðlilegt slit á 10 ára gömlum bíl. Ég gerðist svo dugleg í kvöld og þvoði bílinn, enda hálf skammaðist ég mín fyrir útganginn á bílnum þegar hann fór á verkstæðið. Hann ber þess augljós merki að ég hugsa ekki eins vel um hann og fyrri eigandi. Mér fannst ég þurfa að þrífa hann fyrir næsta skipti rétt eins og allar konurnar sem hamast við að þrífa áður en húshjálpin kemur he he. Ég held ég láti einhvern annan taka hann í alþrif, ég bara meika ekki að hamast við að nudda alla bletti á bílnum og bóna hann. Svo sýnist mér ég þurfa að láta bletta í hann, steinakast á vegum landsins tekur sinn toll af lakkinu. Ég var heppin í vikunni að framrúðan skyldi ekki springa á ferð minni yfir Þverárfjall þegar steinn flaug í rúðuna.

fimmtudagur, júní 28, 2007

Lesarinn

hæ hæ
Ég er að uppgvötva nýjan hlut sem sparar tíma fyrir mig, yndislegt alveg. Þetta er Google Reader þar sem ég set inn allar þær Bloggsíður sem ég fylgist með og þá þarf ég bara að fara á einn stað, þar kemur fram hvort ný færsla hafi verið skrifuð síðan ég leit þangað inn síðast. Þá sleppur maður alveg við þennan eilífa rúnt á milli síðna.
Barasta nokkuð gott.

miðvikudagur, júní 27, 2007

Geysir

Ég verð að segja að ég er ósammála því sem formaður félags leiðsögumanna segir um aðstöðuna á Geysissvæðinu á mbl.is í gær. Hún segir að það þurfi lítið að bæta aðstöðu þar. Ég vona að það hafi verið svolítill útúrsnúningur hjá blaðamanni Morgunblaðsins frekar en skoðun hennar. Jú vissulega verður að treysta á almenna skynsemi hjá fólki og að það er mögulegt að eyðileggja upplifunina af staðnum með því að byggja og gera of mikið. En það er því miður svo að almenn skynsemi er hreint ekki eins almenn og af er látið. Ekki síst er hætt við að hún hverfi þegar forvitnin verður öllu öðru sterkari. Ég hef rasað út hérna áður um þetta málefni, þ.e. öryggismál ferðamanna og finnst ég soldið vera að endurtaka mig og ætla frekar að sleppa því að skrifa meira en að röfla bara svona út í eitt. Það er til nóg annað til að röfla yfir. Sérstaklega þegar ég er ekki að vinna við þetta eins og er, og ég hugsa að ég muni ekki gera mikið af því í framtíðinni heldur. Ég ætla bara að ferðast mér til gamans.

föstudagur, júní 22, 2007

á fartinni

er að reyna að komast út úr húsi í vinnuni, gengur illa. Alveg að komast út, fer heim, þarf að pakka smá saman og er þá komin af stað suður. Verð f. sunnan þessa helgina og svo mikil vinna í næstu viku. Þarf að sýna íbúðina á meðan ég er f. sunnan.
Er djööö þreytt, þarf að fá mér dekkri gardínur í svefnherbergið.

miðvikudagur, júní 20, 2007

Pakkar

Dagurinn í dag var góður, ég fékk tvær sendingar. Þvottavélin mín kom með pósti og rúmið mitt kom líka í dag með Flytjanda. Ég setti saman rúmið og hlakka mikið til að prófa það í nótt. Það er nokkuð víst að þetta er stærsta rúm sem ég hef nokkurn tímann átt. Svo er að sjá hvort ég sofi vel í því.
Þvottavélina er ég ekki búin að prófa því mig vantar smáhlut til að tengja hana, redda því á morgun. En sem sagt ég er að verða búin að koma mér fyrir hér. Ég fékk líka tvær fyrirspurnir um íbúðina í bænum, svo ég ætti að geta leigt hana út auðveldlega. Vonandi fæ ég almennilegan leigjanda, það er mesta óvissuatriðið. Hingað til vissi ég að ég væri með besta leigjanda sem ég gæti fengið, en því miður er hún að fara annað. Gott fyrir hana ekki fyrir mig he he.

Ég skráði mig í háskólann í dag líka, ég byrja í Diplómanámi í opinberri stjórnsýslu í haust, ef mér líkar það get ég fengið það metið upp í meistaranám í opinberri stjórnsýslu MPA.
Ef ekki þá hætti ég bara.

fimmtudagur, júní 14, 2007

hæ hó

Jæja ég ætla að koma í bæinn um helgina. Ég þarf að setja upp minnismiða um það sem ég þarf að gera um helgina svo ég gleymi því ekki. Svo getur maður vonandi gert eitthvað skemmtilegt líka.
Það er búið að vera soldið mikið stress í vinnuni en það er að lagast eftir daginn í dag. Nú fer kórinn að fara að herða sig í æfingum, það fer að líða að ferðinni okkar til Færeyja. Í dag heyrði ég að við munum víst syngja á Húnavökunni sem er bæjarhátíðin á Blönduósi í júlí. Svo nú verðum við að fara að vera dugleg.
Ég þarf að fara að klára að ganga frá íbúðinni hérna, fá mér þvottavél og nýtt rúm. En svo verð ég að fara að hugsa aðeins um sjálfa mig, því ég er orðin svo þjáð af vöðvabólgu að það er ekki fyndið. Ég finn spennu í kjálkunum svo það er líklegt að ég sé farin að gnísta tönnum á ný. Gvuð hvað ég er booooring í þessari færslu en svona er þetta stundum það er bara ekkert að segja.

þriðjudagur, júní 12, 2007

nettengingin komin

hæ hæ
Nú er tengingin komin, loksins loksins. En engin tími til að gera neitt, svo sem að fara að skanna allar gömlu myndirnar. Eða skrifa neitt af viti. Það er nóg að gera fyrir vinnuna. En ég skelli samt nokkrum myndum inn á myndaalbúmið fyrst ég er að þessu.

mánudagur, júní 11, 2007

nettenging heim

jæja ég er búin að panta nettengingu heim en hún virkar ekki einhverra hluta vegna, er á leið að kvarta. Þegar það er komið í lag get ég gert eitthvað heima þá fer ég kannski að skella inn fleiri myndum og svoleiðis.

miðvikudagur, júní 06, 2007

Frítt fyrir námsmenn í strætó

Ég sá á mbl.is að eitthvað er verið að ath möguleikana á því að hafa frítt f. námsmenn í strætó. Það er náttúrulega mjög sniðugt. Þegar ég var í mínu námi úti í þýskalandi þá var fyrstu árin engin stúdentaafsláttur á almenningssamgöngunum innanbæjar. En á einhverjum tímapunkti hafði stúdentaráði eftir langar og strangar viðræður við borgaryfirvöld komið því í gegn að stúdentaskírteininu fylgdi strætókort fyrir hálft ár. Það var að vísu ekki alveg ókeypis heldur var skráningargjald fyrir hverja önn hækkað, innan skynsamlegra marka og það gjald var fyrir strætókortið, hvort sem nemendur notuðu strætó eða bíl þá urðu allir stúdentar að greiða þetta gjald. Á móti greiddu borgaryfirvöld eitthvað niður, þetta var náttúrulega smápeningur sem við greiddum þarna í samanburði við fulla verðskrá í strætó. Vissulega voru nokkrir bíleigendur sem röfluðu yfir því að þurfa að greiða fyrir strætó þegar þeir notuðu almenningsamgöngur aldrei... en svo fór maður að hitta þessa einstaklinga í strætó. Fyrst þeir voru að borga fyrir þetta og svo er svo erfitt að fá bílastæði....

sunnudagur, júní 03, 2007

að koma sér fyrir

Ég er fyrir norðan þessa helgina og reyni að nýta tímann til að koma mér fyrir sem og að vinna eitthvað. Ekki hefur mér orðið eins mikið úr verki og ég ætlaði mér.
Svo verð ég langa helgi fyrir sunnan næstu helgi. Ég fæ mér frí á föstudaginn.
Mig vantar enn að kaupa 2 stóra hluti til að geta komið mér fyrir almennilega hérna. Mig vantar þvottavél og tvíbreitt rúm. Ég fékk gefins sófa sem komið var með í dag, hann er ljótur en þægilegur svo hann dugar mér, ég skellti bara gömlu rúmteppi yfir hann. Ég er búin að finna mér rúm í Ikea en það vantaði hlut í það svo ég gat ekki keypt það um daginn. Soldið vesen að vera svona langt í burtu, en það hefst. Svo þarf ég að mála eina hillu, vantar rétta lakkið í það, lakkið sem ég keypti er ekki að duga.
Ég er líka búin að vera að dunda mér við að ná 4 umferðum af málningu af gömlum náttborðum frá mömmu, það tekur sinn tíma þó ég notist við hitablásara til að losa málninguna af, en það er gaman að þessu dundi. Verst hvað þessu fylgir mikið drasl.
Svo á ég eftir að setja upp einhver ljós, mamma ætlar að koma og sauma gardínur, og svo þarf að bora fyrir nokkrum hillum og þá fer þetta að verða komið.
Á mánudaginn ætla ég svo endilega að panta adsl tengingu og fá mér líka sjónvarp um adsl.

miðvikudagur, maí 30, 2007

bloggedíblogg

Til að verða við áskorun ákvað ég að skrifa nokkrar línur, það getur verið svo leiðinlegt þegar svona síður deyja bara útaf. Netheimurinn er yfirfullur af vanræktum heimasíðum. Ég tók mér eina vanrækta heimasíðu í fóstur. Það er heimasíða Samtaka félagsmálastjóra á Íslandi, www.sfi.is. Sú síða hefur ekki verið uppfærð síðan 2003. Ég hef trú á að með einnar klukkustundar vinnu á mánuði væri hægt að viðhalda þessari síðu svo ásættanlegt sé fyrir þessi samtök. Allavega ákvað ég að reyna þetta fram til hausts, ef ekki gengur verður hún einfaldlega lögð niður.

Hvað er svo annað í fréttum, látum okkur nú sjá.. Linda og fallega fjölskyldan hennar er flutt heim á klakann. Íbúðin mín í Fellsmúlanum losnar aftur um næstu mánaðarmót, þá þarf ég að leita að nýjum leiganda. Þekkir einhver, einhvern sem hægt er að mæla með ....????

Ég var í bænum um síðustu helgi og hvað gerðist markvert þá, hmmm, ég fór í heimsóknir til Lindu og til Bjarkar, ég fór í Ikea og gat ekki keypt rúmið sem ég ætlaði að kaupa, verslaði eitthvað af öðru drasli, ég fór í sund með Guðdísi og bróðir minn setti nýja útvarpið í bílinn minn. Og þvílíkur munur sem það nú er... ég brenndi einn disk m. mp3 og þurfti ekki að skipta einu sinni um disk alla leiðina, diskurinn er enn ekki búinn. Gamla tækið var með kasettuspilara og var eitthvað farið að bila, flækti spólur og var með alls kyns aukahljóð.

Í dag gerðist ég dugleg og skrapp í blóðbankabílinn og gaf blóð, þetta var 5 skiptið sem ég gaf og fékk ég nælu gefins af því tilefni.

sunnudagur, maí 20, 2007

Reynisfjara

Ég get ekki hætt að hugsa um leiðsögumanninn sem var svo óheppin að vera með þennan hóp í Reynisfjöru í gær. Því þetta hefði getað komið fyrir hvern sem er.

Ég var að hugsa um það hvað það er auðvelt að gleyma að vara fólkið við hættunum á einum stað kannski í langri ferð, þó að það hafi ekki átt sér stað hérna. Því það er annað sem spilar inn í, hvort fólk sé að hlusta og hvort það taki mark á því sem þú segir. Ég hef verið að benda fólki sem var með mér á, að standa ekki í flæðarmálinu og hef æpt á fólk að vara sig þegar aldan kemur nær.

Ég hef samt aldrei verið eins nervus þarna og ég hef verið í flestum ferðum á Geysi. Úff það svæði er algjör skelfing, það er ekki hægt að bjóða ferðamönnunum upp á þetta. Viðvörunarskiltin eru lítil og auðvelt að yfirsjást, það eru engar girðingar bara smá kaðlar til að girða hverina af. Mjög margir taka ekkert mark á þessum köðlum og vaða bara yfir og alveg ofan í Geysi sjálfann. Ég hef alltaf varað fólkið mitt við öllum hættum þarna með mikilli áherslu á Geysi sjálfan og svo sér það annað fólk ganga þarna að og ef leiðsögumaður hefur ekki tvítekið fram hættuna þá eltir það þessa aðila hreinlega og hugsar ekki. Ég hef því verið að reka fólk í burtu, öskrað á það að fara, varað það við. Einu sinni var það íslendingur með erlenda ferðamenn með sér og hann öskraði á mig til baka að skipta mér ekki af. Ég var svo gáttuð að ég þagnaði.
Ég þekki leiðsögumann sem bjargaði lífi fólks með svona afskiptasemi á Geysi og það var í fréttunum fyrir nokkrum árum, því Geysir tók að gjósa um leið og hún kom fólkinu í burtu, en svæðið hefur samt ekki batnað síðan þá. Það er hreinasta kraftaverk að ekki hafi orðið eitt eða fleiri dauðaslys á ferðamönnum þarna.

Það var af öryggisástæðum sem ég hætti að fara í ferðir með hópa sem tala mér ókunnugt tungumál. Þ.e.a.s. hópa sem eru með fararstjóra sem taka við míkrófóninum og tala allan tímann við hópinn, miklu meira en ég kem að við fararstjórann sem eiginlega á að þýða það sem ég segi. Mér finnst þeir alltaf tala miklu meira en ætti að vera bein þýðing, og svo skilur maður ekki orð af því sem þeir segja og getur ekki verið viss um að skilaboðin skili sér. Ég var með tékkneskann hóp á Reykjanesinu og síðar Geysi og átti ég í mestum vandræðum með þennann hóp og hópstjórann.Og var með hjartað í buxunum allann tímann. Ég hefði þá þurft að bera ábyrgðina ef slys hefði orðið og fólk hefði ekki vitað af hættunni. Svo ég fer bara ekki í svona ferðir meir.

Ég hef tekið það fram við ferðamennina þegar ég er með allar þær viðvaranir sem nauðsynlegar eru í svona ferðum, að ég hafi lært skyndihjálp en ég hafi aldrei þurft að nota hana og sé því ekki viss hvort ég sé góð í henni og vilji hafa það þannig áfram.

komin heim

Ég er komin heim eftir góða viku í svíþjóð. Við fengum flottari bíl en við pöntuðum, Mazda 5, það var svo gott að keyra hann að ég sakna hans ennþá. Minn bíll var óskemmtilegur eftir þetta en jæja ég verð að lifa með því. Ég verslaði dálítið, eitthvað fyrir heimilið, einhver föt og eitthvað af snyrtivörum. Svo fékk ég heilmikið af tölvutengdu dóti, forrit og leiðbeiningar og afrit af myndum hjá Ingó og Torfa. Ég sat í gær og horfði á gömul heimavideo frá 1988 ég bæði hló og grét yfir þessu. Krakkarnir voru öll svo lítil, (tvö ófædd ennþá) þetta var tekið árið sem þau fóru út, 1/2 ári fyrr. Þarna voru upptökur frá sjoppunni sem ég og systir mín unnum í, upptökur af okkur báðum að afgreiða, upptökur af mér að skúra gólfið eftir lokun. Upptökur af ættarmóti af tilefni 80 ára afmælis hennar ömmu. En að mestu leyti krakkarnir að leika sér og allt í kringum það.
T.d. Magga segir við mömmu sína að hún væri allra allra besta mamma í heimi ef hún leyfi sér að fara í sund,
Ingibjörg: ég er kannski besta mamma í heimi en konurnar í sundlauginni leyfa það ekki
Magga svarar: þá ert þú ekki besta mamma í heimi
Ingibjörg: konurnar í sundlauginni leyfa það ekki fyrr en þú ert orðin 8 ára og þú ert bara 4 ára
Magga: af hverju?
Ingibjörg: af því þú ert bara 4 ára en bráðum 5 ára.
Magga: Hvenær, í dag?

Ég var búin að gleyma því hvað Magga var alltaf að flýta sér að verða stór, hún hélt alltaf að hún gæti allt og væri eldri en hún var, he he að ætla sér ein í sund 4 ára.

laugardagur, maí 12, 2007

Kveðja frá svíþjóð

Jæja þá er fermingin yfirstaðin,og nú er bara að bíða eftir júróvisíón og kosningasjónvarpi á netinu og jafnvel eitthvað farið í Singstar. Við fengum þrátt fyrir spá um annað fínasta veður í dag,sól og ca 18-20 stiga hiti, vonandi fáum við svona veður það sem eftir er ferðarinnar þá kannski kemur maður með smá lit heim. Fermingarbarnið fékk óskir sínar uppfylltar,það eina sem hún óskaði eftir var að fá pening í fermingargjöf, og það tókst næstum því hún fékk líka 3 skartgripi.
Hún ætlar að fá sér rosalega fína myndavél með alls kyns aukahlutum linsum og græjum og hún fékk næstum því nægan pening fyrir því, hún þarf að afla sér smávegis sjálf.
Annars er lítið planað næstu daga nema eins og 2 dagsferðir, einu sinni til Jönköbing og einu sinni til Ullared. Svo verður náttúrulega tekin ein dagsferð til Köben á fína bílaleigubílnum þegar við förum heim.

mánudagur, maí 07, 2007

Á hraðferð

Ég var að koma af fundi núna rétt f. kl 5 og svo þarf ég að fara að koma mér af stað suður. Ég þarf að vera í Reykjavík á morgun og svo aftur hér fyrir norðan á miðvikudag, svo þetta er algjör hraðferð. Suður í kvöld, norður seinni partinn á morgun, suður aftur miðvikudagskvöld, flýg út á fimmtudag og verð viku í Sverige, þannig að á fimmtudag á ég líka langa ferð framundan. Flug til köben og síðan með bílaleigubíl í 4 tíma. Og það er ég sem keyri, mamma er ekkert að keyra ef það fæst einhver annar í það. Svo engin bjór í fluginu handa mér, uss uss, ég er hvort eð er hætt því að fá mér bjór í flugi, maður þrútnar svo af því.

laugardagur, maí 05, 2007

Flutningar

Jæja það gekk ýmsilegt á í gær, ég var að vinna til 4 kláraði að pakka kl 5 og þá komu nokkrir hjálparkokkar og hjálpuðu mér að flytja á 2 tímum. Ég var flutt fyrir fréttir, sem betur fer. Ég er búin að flytja 3 sinnum á rétt tæpu ári núna og mér finnst það ekki gaman. Í bæði hin skiptin fékk ég aðstoð með einn kerrufarm, þ.e. stóru hlutina, húsgögnin. En tók alla smáu hlutina í endalausum ferðum með eigin bíl, alein. Það er ekki málið þetta sé mér ofviða, en þetta er þreytandi og lýjandi enda mikið að bera alla þessa kassa og tekur allt of langann tíma. Svo þetta voru viðbrigði að fá svona mikla hjálp og geta lokið þessu af á þetta stuttum tíma. Júhú... svo er ég meira að segja búin að þrífa gömlu íbúðina. Nýtt heimilisfang er Húnabraut 42.
Nú er allavega nóg að gera hjá mér, verð að drífa mig í búðina.

fimmtudagur, maí 03, 2007

Stress og leti

úff, ég er nú soldið stressuð út af því hvað það er mikið að gera í vinnuni. En samt er ég soldið löt í vinnuni, ég skil ekki hvað gengur að mér. En allavega var ég dugleg að gera hluti fyrir sjálfa mig í dag, lét skoða bílinn, skipta um dekk og fór svo meira að segja að kjósa.
lengra verður þetta ekki að sinni því ég þarf að klára nokkur verkefni í dag.
kv.
Auður

þriðjudagur, maí 01, 2007

ýmsar tilraunir

mig greinilega langar ekki til að vinna eða pakka. Ég ætti að nýta tímann í að vinna eitthvað en nú er ég búin að eyða allt of miklum tíma í eitthvað tölvu dútlerí. Ég setti upp picasa hjá mér, var einhvern tímann með það en var aldrei búin að ná í það fyrir þessa tölvu svo náði ég mér í firefox þar sem IE er búinn að vera að pirra mig verulega. Ég er búin að reyna fyrir mér með að birta myndir í gegnum picasa en einhvernvegin er þetta ekki alveg að ganga upp. En núna verð ég að hætta þessu í bili og gera eitthvað af viti.

myndaalbúm

hæ hæ ég er að búa til picasa myndalbúm http://picasaweb.google.com/ausinn, nú spyr ég ykkur sem hafa blogspot og picasa, hvernig ég set link á albúmið inn á bloggsíðuna, hvað segir þú Linda þú ert með sama Template?

sunnudagur, apríl 29, 2007

Blogg og bloggarar

Nýlega hafa bæst við enn fleiri bloggsíður til að fylgjast með. Þetta er farið að taka ansi mikinn tíma hjá manni daglega að fara bloggrúntinn. Kannski maður ætti að kýkja á þessar síður annann hvern dag en ekki mörgum sinnum á dag. Fólk er misduglegt að skrifa á síðurnar sínar, sem er kannski ekki undarlegt, flestir hafa eitthvað annað og betra við tímann að gera en að skrifa á bloggsíðurnar. Helstu síðurnar sem ég skoða eru hjá fólki sem ég þekkji persónulega, eða hef þekkt persónulega í gegnum tíðina. En svo eru nokkrar síður sem ég kýki oft á sem eru meðal vinsælustu síðnanna hjá mbl.is. s.s. Ellý og Sigmar, þau geta verið ansi fyndin.

laugardagur, apríl 28, 2007

þvílík pressa

það er aldreilis pressa á manni að fara að skrifa. Barasta 5 komment um að beðið sé eftir pistli. Ég hef reynt að líma inn hér pistla sem ég var búin að skrifa og kóperaði svo en hef ekki getað sett inn ennþá. Smá tæknivandamál með blogger ennþá, en ég er nú ekki enn á því að flytja síðuna samt. Svona pressa stöðvar alla frjóa hugsun. Hvað ætti ég að skrifa um núna.
Ég er mjög upptekin í vinnuni þessa stundina, næ ekki að klára öll verkefnin sem eru fyrirliggjandi. Sem er náttúrulega slæmt, en ég nýti allar stundir núna, vinn núna um helgina og 1 maí líka. Ég tek mér svo frí þegar færi gefst, ég fer til svíþjóðar 10-17 maí. Þar verður síðasta fermingin þann 12 maí,líkt og fyrir 2 árum verður núna Júróvisíon fermingar partý. Sem er bara gaman, að syngja júróvisíon lög með "litlu" frænkunum. Svo er ég búin að greiða inn á færeyjarferðina með kórnum í júlí.

þriðjudagur, apríl 24, 2007

jæja búin að skipta yfir í nýja blogger

ég er búin að skipta yfir í nýja blogger kerfið, svo núna ætti þetta að ganga betur hjá mér.

þriðjudagur, apríl 17, 2007

helv. vandræði m. blogger

þetta helv. ætlar ekki að virka

miðvikudagur, apríl 11, 2007

Smá pælingar um tímann / dagbókarform

Vinkona mín sem frétti fyrst af þessari síðu í dag, sagði mér að nú hefði hún sko eitthvað að lesa í kvöld fyrst ég hefði bloggað síðan 2002. Það sló mig soldið að ég hafi haldið þessari síðu úti svona lengi, ég hafði bara ekki tekið eftir því hvað þetta er búið að vera langur tími. Ég fór þá að líta aðeins inn á gamlar færslur, jemundur minn ég fékk sjokk. Fullt fullt af hlutum sem ég mundi ekki eftir og hafði gaman að lestrinum. Ég var nú samt soldið sjokkeruð yfir því hve opin ég gat verið í þessum færslum. Þetta er nú soldið opinber dagbók og ég sem hef aldrei getað haldið dagbók af ótta við að einhver læsi mínar innstu hugsanir. Fyrir utan það að ég hélt það aldrei út, gleymdi að skrifa. Það eina sem nálgast dagbókarformið eru bréfaskriftir við bestu vinkonuna, ég á enn öll bréfin hennar. Ég ætlaði að ljósrita þau og gefa henni innbundin í 30 afmælisgjöf en komst einhvernveginn ekki til þess. (Þú fyrirgefur vonandi framkvæmdarleysið) Ég vona bara að hún eigi eitthvað af mínum ennþá!! Svo við getum skipst á bréfum og lesið þau sem nokkurskonar dagbækur úr gamalli tíð.
Úff þetta blogg er soldið á mörkunum þegar ég hugsa um það. Málið var að fyrst vissu bara 2 aðilar sem þekktu mig af síðunni og var þetta svona okkar á milli þó að á opinberum miðli sé. Núna er ég búin að segja fleirum af síðunni og það eru jafnvel linkar á hana á síðum annara svo ekki er hún eins prívat og hún var í upphafi. Og skrifin eru líka orðin öðruvísi. Þrátt fyrir þessar pælingar er ég ekkert að fara að hætta þessu, er bara að pæla í þessu öllu saman.

Gleðilega páska (soldið sein)

Ég vona að allir hafi notið páskanna sinna. Ég er ánægð með mína páska, það var komin tími á að heimsækja alla gömlu vinina aftur. Veðrið var að mestu leyti gott, m.a. sól og 20 gráðu hiti og vor í lofti. En ég var alveg búin að gleyma hversu kalt það getur verið á þessum árstíma þegar engin sól er á lofti. Næturnar eru ansi kaldar, rakinn gerir það að verkum að það virkar kaldara enn það er í raun. Brr og svo eru húsin aldrei eins vel hituð og hér. Vinum mínum gengur misvel eins og gerist og gengur sumir hafa lélega vinnu, aðrir góða og enn aðrir enga. Evran fer mjög ílla í alla, svo ég vísi í það sem ég skrifaði í febrúar um Evruna. Öll umræðan hér fer alveg framhjá því hvernig almenningi líður. Ég talaði við Grikkja sem sagði verðlag hafa þrefaldast þar síðan Evran var tekin upp, þar er mjólkin dýrari en hér. Í þýskalandi hefur verðlag almennrar neysluvöru tvöfaldast á sama tíma og launin hafa staðið í stað. Mér skilst að verðlagsvísitalan sýni ekki þessa hækkun vegna þess að húsnæðisverð er inni í vísitölunni. Sem skýrir margt, hækkanir á húsnæðisverði hér kom verðbólgunni af stað um árið. Ef maður skoðar vísitölu neysluverðs hjá Hagstofunni þá er oft mikill munur á neysluvísitölu með og án húsnæðis. Svo skoðun mín á upptöku Evrunnar á Íslandi er enn óbreytt.
En mikið var nú samt gott að sitja í Bjórgarði og drekka bjór úr líterskrús í sólskinsveðri. En nú bíður vinnan svo þetta verður ekki lengra.

sunnudagur, febrúar 25, 2007

Prinsessur og afmæli

Hamingjuóskir í allar átti.
Elsku Linda til hamingju með afmælið, fyrsta afmælið sem mamma... er það ekki bara betra en áður.
Elsku Larissa til hamingju með fallegu prinsessuna þína... njóttu þín.

Bank bank

Nýju auglýsingarnar frá SPRON eru meiriháttar kaldhæðni í mínum augum. Almennt séð er fólk mjög tregt til að skipta um banka, það byrjar í einum og er þar áfram nánast hvað svo sem gengur á. Í þessum auglýsingum frá Spron er verið að sýna fólk sem er við það að segja bankanum sínum upp, með það fyrir augum að reyna við SPRON.
Sem er gott og blessað, bankamál hafa mikið verið í umræðu undanfarnar vikur. Gróði bankanna, áberandi markaðsstarf, nafnabreytingar, stórfenglegar veislur og önnur eyðslusemi sem fólk hefur tekið eftir. Vangaveltur koma upp varðandi það hvort bankarnir ættu ekki frekar að lækka þjónustugjöldin eða gera eitthvað annað fyrir viðskiptavinina frekar en að eyða peningum á þennan hátt. Svo vissulega getur verið sóknarfæri fyrir banka sem ekki hefur verið áberandi fyrir eyðslusemi. En aftur af minni reynslu af SPRON.
Nánast öll fjölskyldan mín hefur verið í viðskiptum við SPRON síðustu 50 ár. Pabbi hafði verið með bankabók þar alla sína æfi þegar hann dó fyrir 20 árum, hann átti allar bækurnar ennþá. Mamma gaf bankanum allar þessar gömlu bækur eftir andlát hans, þær hljóta að vera merkur hluti af sögu bankans. Þegar þau giftu sig fyrir 50 árum varð mamma viðskiptavinur SPRON. Hún persónulega er sem sagt búin að vera í viðskiptum við bankann í 50 ár, hefur alltaf staðið í skilum þ.e.a.s. verið fyrirmyndar viðskiptavinur. Hún varð óánægð með bankann á síðasta ári, hún gerði þá kvöfu að hún gæti fengið sömu þjónustu þar og í öðrum banka, þar sem hún hefur einnig verið í viðskiptum undanfarin ár. Við þeirri ósk var ekki orðið, hún sendi uppsagnarbréf til bankastjórans þar sem hún tók fram hvaða kröfur hún hefði gagnvart bankanum auk þess sem hún tók fram hversu lengi við hefðum verið í viðskiptum við bankann. Hún hefur ekki fengið nein svör við því bréfi. Hún er því búin að segja upp bankanum sínum og komin í viðskipti annarstaðar. Það má einnig taka það fram að hún fékk ekki jólagjöf frá bankanum þegar allir aðrir fengu jólagjafir frá bankanum síðustu ár. Nýji bankinn sendi henni meira að segja afmælisgjöf á 70 afmælinu.
Ég er reyndar ennþá í viðskiptum við SPRON, en það er bara af því að ég er í miklum vandræðum með að finna réttann banka fyrir mig. Einhvern sem ekki er búinn að vera áberandi fyrir eyðslusemi og óhófleg þjónustugjöld. Ég verð að drífa í þessu núna og skoða alla bankana til þess að ákveða mig. Ég hef hugsað mér að segja SPRON upp því þeir ljúga því í auglýsingum sínum að þeir lagi sig að þínum þörfum. Þeir taka ekki mark á gömlum viðskiptavinum og leita frekar að nýjum. Viðskiptatryggð skiptir engu máli.

miðvikudagur, febrúar 07, 2007

Evra eða ekki Evra

Ég hreint út sagt skil ekki þessa umræðu um Evruna, skoðanakönnun sýnir að jafnmargir vilja Evru á Íslandi og hafna henni. Ég lenti í úrtaki og sagði hreinlega að ég bara vissi það ekki, þegar ég var spurð hvort taka ætti upp Evru á íslandi. Þetta er ekki svo einfalt að það að skipta um gjaldmiðil myndi breyta efnahagsmálum á Íslandi. Ég held að skuldinni sé of einfaldlega skellt á krónuna, þegar pólitísk stjórnun efnahagsmála er ábótavant. Sem og íslendingar sem neytendur eru hjarðdýr sem láta bjóða sér hvað sem er...
Það hefur hvergi í umræðunni verið minnst á þær fórnir sem almenningur í Evrópu hefur þurft að færa vegna upptöku Evrunnar. Verðbólga átti sér stað í skugga breytinganna,t.d. í þýskalandi átti hlutfallið á milli Evru og Marks að vera 2 Mörk fyrir eina Evru. Fljótlega fór að bera á því að hlutir sem kostuðu 1 Mark fyrir breytingu kostuðu 1 Evru eftir breytingu. Á þessum hlutum var því 100% hækkun.
Þeir íslendingar sem muna svo langt aftur í tímann sem til ársins 1981 þegar krónan var gjaldfelld og 00 tekin aftan að, hljóta að muna eftir slíkum dæmum. Við erum bara að upplifa það núna að þegar að lækka á virðisaukaskattinn þá eru vörur hækkaðar áður en til þess kemur til að græða alveg örugglega á þessu.
Sem sagt að taka upp Evru er ekki mál sem afgreitt er með einni einfaldri spurningu án þess að fólk sé upplýst um hvað málið snýst.

mánudagur, febrúar 05, 2007

Ferðalög

Jæja árið 2007 lofar að verða ferðaár hið mesta. Allavega eru 3 ferðalög í pípunum hjá mér, en það ætlar ekki að verða sársaukalaust að finna flug og annað tilheyrandi.
Fyrst er af því að segja að mig langar að skreppa til Munchen og Augsburg um páskana en þá eru samgöngur þangað heldur lélegar. Flest lággjaldaflugfélögin sem flugu þangað frá öðrum stórborgum evrópu hafa hætt að fljúga þangað. Expressinn flýgur til Friedrichshafen en bara ekki á þessum tíma... (vetraráætlun líkur miðjan mars, byrja aftur að fljúga í lok apríl) Svo ég er á báðum áttum orðið með þá ferð, nei ég ætla að fara, þó það sé bölvað vesen.
Svo er ég að fara með mömmu í vikuferð til svíþjóðar í seinustu ferminguna þar um miðjan maí, ég veit ekki hvernig stendur á þessu en fermingarnar eru alltaf á sama degi og Eurovision??? Sem er svo sem ekkert slæmt það er gaman að því, ég held ég hafi horft á fleiri Eurovision keppnir erlendis en heima frá því íslendingar hófu keppni, annað hvort í svíþjóð eða þýskalandi.
Last but not least er planið að fara í söngferð með kórnum á Ólafsvöku í færeyjum, síðustu helgina í júlí.
Svo er aldrei að vita nema að maður láti sér detta í hug einhverjar fleiri ferðir svona last minute.

fimmtudagur, janúar 25, 2007

klúður

ég var búin að skrifa helling, fékk blogger ekki til að birta það. Stressaði mig ekki yfir því var svo séð að kópera allt. En gleymdi því svo og kóperaði síðar eitthvað annað án þess að hafa komið öllum textanum einhversstaðar fyrir svo textinn týndist þó að ég hafi passað að kópera. æj æj nenni þessu ekki

þriðjudagur, janúar 23, 2007

Köttur og mús

jæja þá er mín barasta komin með gæludýr, alveg óviljandi. Og er núna algjörlega ósofin og taugatrekkt. Svo er mál með vexti að það er músagangur hjá mér og mýslan vill ekki í gildru svo ég greip til þess ráðs að fá lánaðan kött. Og kötturinn hélt fyrir mér vöku í nótt frekar en tilhugsunin um mýslur.

mánudagur, desember 25, 2006

Gleðileg jól

Gleðileg jól
Mikið er nú gott að eiga góða að þegar eitthvað bjátar á. Á jólum gæti smáatriði sett soldið stórt strik í reikninginn. Svo sem eins og þegar ofninn reynist bilaður kl: 4 á aðfangadag. Hvað gerir fólk þá, fyrir utan hangiketið er nánast allur matur á jólum eldaður í ofni. Sem betur fer kaupa flestir allt of mikinn mat og lítið mál að bæta matargestum við á síðustu stundu. Steikin hennar mömmu fór barasta beina leið í frystinn og við Mamma og Börkur fórum í mat til Hlyns bróður í gær. Svo var planað að fara til þeirra í hangikjöt í dag og gerðum við það. Á morgun er öll fjölskyldan boðin í kalkún til mömmu, svo við verðum að skutlast með fuglinn til Hlyns, steikja hann þar og koma honum svo hingað. Það er mjög hentugt að bræðurnir séu hérna í næsta nágrenni við mömmu. Þá er hægt að redda þessu án þess að maturinn kólni á leiðinni, auk þess sem hægt er að drekka rauðvín með matnum og ganga heim.

fimmtudagur, desember 21, 2006

heimför frestað

Veðurhamurinn lætur ekki að sér hæðast, það er alveg á hreinu. Ég held ég bíði þar til þessi stormur sem spáð er í dag er liðinn hjá. Það breytir engu þó ég hafi bara þorláksmessu til að versla allar jólagjafirnar. Ég verð bara að lifa með því, kannski ég fái einhverstaðar eina róandi til að hafa það af að vera að versla á þessum degi. Mamma á líka allan jólaundirbúning heimilisins eftir, þ.e. fyrir utan það að versla. Hún var nefnilega að koma frá Kanaríeyjum í gærkvöldi, jæja aðalatriðið er nú bara að kaupa í matinn, við getum bara slökkt ljósin og verið með kertaljós eingöngu til þess að fela rykið og skort á öðrum skreytingum. Mútta er eflaust búin að kaupa sér jólasúkkulaðið sitt frá Lindt í fríhöfninni. Þá er um að gera að redda henni nýjum og spennandi glæpasögum og hún er happy camper.

sunnudagur, desember 17, 2006

Blogglestur

Ég er nú ekki manna duglegust að skrifa á þetta blogg, tek mig samt á öðru hvoru sérstaklega þegar ég tek eftir því að þessir pistlar eru lesnir. Þ.e.a.s ég fæ einhver komment. En ég er mikið duglegri við að lesa önnur blogg, það eru fastir liðir í rúntinum sumar eru lesnar daglega aðrar sjaldnar. Það eru ýmsar barnasíður vina og vandamanna, maður fylgist með mörgum einstaklingnum vaxa úr grasi í fjarlægð. Svo er það náttúrulega saumaklúbburinn, vinir erlendis og vinir vina erlendis. En öðru hvoru rekst maður á gamalkunnugt fólk sem maður átti samleið með einhvertímann á lífsleiðinni sem maður er farin að fylgjast með daglega svo sem eins og Silja sem var með okkur í 9 bekk og Lára gömul bernskuvinkona frá Háaleitinu og Álftó. Gyða og Linda ættu að muna eftir þeim, aðrir lesendur láta sér bara fátt um finnast.

fimmtudagur, desember 14, 2006

Öryggi í umferðinni

Jú víst er það Gyða, ég hvíldi mig um leið og ég fann að kaldur gustur var ekki nóg til að hressa mig við. Og þvílíkur munur sem 10 mín. lúr getur gert. Öll fjölskyldan hefur lagst á eitt við að ráðleggja mér um hvað ég þurfi að hafa með í bílnum til að vera örugg á þessum vetrarferðum mínum norður og suður. Svo nú er ég komin með svefnpoka í bílinn, líka loðfóðraðann útigalla, gönguskó, skóflu, keðjur, kerti, vasaljós, heitt vatn á brúsa, harðfisk, húfu og vettlinga. Það má segja að ég sé bara orðin við öllu búin, nema því að hafa farþega í bílnum því á endanum verður ekkert pláss í bílnum. Og héðan í frá fer ég ekki af stað nema úthvíld, ég geri mitt besta til að aka varlega, á viðeigandi hraða, ekki taka framúr nema ástæða og aðstæður bjóði upp á það, ég geri allt í mínu valdi til að vera örugg í umferðinni en ég get ekki ábyrgst það sem aðrir gera. Bíllinn er í góðu standi, ég er með auka brúsa af rúðuvökva og dekkjahreinsi í bílnum. Til skemmtunar hlusta ég svo á hljóðbækur á meðan á ferðinni stendur, engin ástæða til að vera alltaf að skipta um útvarpsrás, annars er útvarpið stillt á gufuna á langbylgju til að missa ekki af fréttum hvar svo sem ég er stödd á leiðinni. Ég held ég sé farin að hljóma eins og Frímann Gunnarsson svei mér þá, hér með er þessum pistli lokið.

föstudagur, desember 08, 2006

desemberstress

Úff, desember er ekki eins ljúfur og ég vildi hafa hann. Stresssið er mann lifandi að drepa. Í fyrsta lagi ætlaði ég aldrei aldrei aftur að flytja í desember, ég hata það að flytja og að gera það ein, en allra mest hata ég að gera það í desember. Maður finnur aldrei neitt, nú finn ég ekki adressubókina mína til að senda kort og pakka út um allt. Og ég fæ ekki svör við sms og email þegar ég óska eftir adressum, hvað er þetta vill enginn tala við mig.
Svo er stress í vinnuni, fullt af fundum, fjárhagsáætlun og svoleiðis vesen. Svo er ég ekki farin að hugsa um aðrar jólagjafir en þær sem fara í póst.
Gleði mánaðarins er að hitta mág minn og yngstu systurdóttur mína sem eru í heimsókn frá svíþjóð núna. Ég gat samt ekki hitt þau fyrr en í kvöld þegar ég kom suður.
Ég var næstum sofnuð undir stýri í dag, ég fékk sjokk þegar ég sá stykki úr fjallinu fyrir framan mig hreyfast, lagði bílnum og lagði mig í 10 mín og hresstist við það, fékk mér svo kaffi við næsta tækifæri. Þetta hefur ekki komið fyrir mig áður.

föstudagur, nóvember 17, 2006

Veður II

Ég er smám saman að læra á það hvernig það er að búa úti á landi og hvernig veður hefur áhrif á allt og þá sérstaklega vetrarveður á norðurlandi. Núna er ég búin að upplifa það að þurfa að breyta öllum ferðaplönum vegna veðurs (maður þekkti það svo sem), að vera veðurteppt heima hjá sér vegna veðurs og komast ekki í vinnuna þess vegna og að vera á ferðinni í veðri sem maður ætti ekki að vera á ferðinni í. Og allt á einni viku. Síðustu helgi fór ég í bæinn á fimmtudegi og til baka á sunnudegi, það var ekki útlit fyrir ferðaveður á föstudegi né á mánudegi. Á mánudaginn komst ég ekki í vinnu vegna veðurs, útidyrahurðin hélt ekki veðrinu svo ég varð að stafla dekkjum upp við hana til að halda henni. Á miðvikudag lennti ég í blindbyl á leið heim úr vinnu og ætlaði að snúa við en það var ansi erfitt þegar maður sá á stundum ekki einu sinni stikurnar hvað þá hvar maður var, í stað þess að snúa við, villtist ég heim! Hvað sem öðru líður þá er ég svo ánægð með bílinn minn sem lætur ekkert á sig fá, drífur allt sem komið er, er stöðugur í allri færð sem við höfum lennt í ennþá. Þetta voru mjög góð kaup.
Í kvöld er svo árshátíð heilbrigðisstofnunar Blönduóss og ég mun syngja með sjúkrahúskórnum uhum, komin tími til að gera sig að fífli.

fimmtudagur, nóvember 09, 2006

Veður

Jæja núna er óveður að skella á þessa helgina eins og þá síðustu og ég veit bara ekki hvað ég á að gera. Planið þessa helgina var að fara suður eftir vinnu í dag, á morgun átti ég að vera á fundi/ráðstefnu í Hvalfirðinum allann daginn. Því er aflýst vegna veðurs. Ég læt mér þá detta í hug að fara þá í vinnuna eins og vanalega á morgun og fara eftir vinnu á morgun. En spáin er ekki góð, óveður allann daginn á morgun. Alls ekkert ferðaveður. What to do... á ég að fara eftir vinnu í dag en þá get ég ekki gert allt það sem ég ætlaði mér að gera á morgun fyrst ég græði þarna vinnudag. Eða bíða og fara ekki fyrr en á laugardag?

þriðjudagur, nóvember 07, 2006

Heima er best

Jæja ég er eflaust að bera í bakkafullann lækinn í bloggheimum með því að taka þetta til umræðu en mig langar til að eyða nokkrum línum í uppákomuna í sjónvarpsþættinum Innlit/Útlit.
Þið sem ekki vitið hvað um ræðir (útlendingarnir ykkar) þá er málið þannig vaxið að fólki ofbauð lýsingarnar á ástandi á íbúð nokkurri sem leit bara þokkalega út í mynd. Ungur maður kaupir sér íbúð og ætlar sér að breyta henni eftir eigin höfði og sjónvarpið fær að kýkja inn fyrir og eftir breytingar. Hmm ég hafði ekki séð þáttin þegar ég las um þetta í blöðunum og varð því að kýkja á þetta þegar ég rakst á endursýninguna í gær. Þess má geta að ég er alveg hætt að nenna að horfa á þennan þátt því magn óbeinna auglýsinga í þættinum er óþolandi.
Og jú ég er sammála því sem ég hef verið að lesa um þetta, dónaskapurinn er yfirgengilegur. Þáttastjórnandi og húseigandi eru sammála um að eldhúsinnréttingin sé algjört ógeð, svo ljót að það væri ekki hægt að bjóða fólki hana gefins. Það væri að gera fólki ógreiða með því. Hmm innréttingin er greinilega ekki eftir smekk allra, en í þokkalegu standi, nýleg meira að segja. Áfram tyggja þeir á orðinu ógeð, þeir gátu ekki einu sinni verið með fjölbreyttan orðaforða í þessum lýsingum sínum. Baðið er ógeð, viðkomandi treystir sér ekki einu sinni til að pissa í klósettið þarna. Allt skal vera rifið út og íbúðin gerð fokheld. Viðarrimlagardínurnar sem voru í íbúðinni voru svo mikill viðbjóður að vinur hans ældi á gólfið yfir því hvað þær væru ljótar. Í mynd var þetta hið þokkalegasta bað kannski ekki það nýjasta og flottasta en ók og hreinlegt á að líta. Ekki eins og á ýmsum staðnum sem maður hefur skoðað um tíðina. Og rimlagluggatjöldin voru þessi dökku breiðu viðarrimlar sem eru svo víða eftir að þeir komust í tísku í kringum 2000.
Ég kann alltaf betur og betur að meta Völu Matt í þessu hlutverki, þó orðaforðinn hafi verið takmarkaður og síendurtekin þegar hún var með þennan þátt, fann hún alltaf eitthvað gott að segja um allt sem hún sá. Ef það var ekki eftir hennar smekk þá var það ekki "augnakonfekt" heldur "áhugavert". Hún hefur eflaust haft í huga að það þarf að hafa áhorfendur góða, sama hvaða smekk þeir hafa. Jafnvel þó hann sé "síðri" en eigin smekkur. Ekki bara vegna þess að þeir kaupa það sem auglýst er í þættinum í meira og minna beinum og óbeinum auglýsingum. Heldur einnig vegna þess að það er fólkið í landinu sem er að hleypa þessu fólki heim til sín og það getur auðveldlega orðið hikandi við að opna dyrnar á heimili sínu. Vill ekki láta dæma sig á þennan veg. Einhver þeirra sem leitað er til síðar gæti allt eins verið sá sem seldi manninum ógeðis íbúðina, hver veit.
En svo er þetta innslag einnig birtingarmynd fyrir tvennt í þessu þjóðfélagi sem ég á erfitt með að umbera: Annarsvegar þessi flottræfilsháttur, henda öllu og kaupa allt nýtt, neytendur fram í fingurgóma, kaupa kaupa kaupa, aldrei nýta, aldrei hugsað um umhverfið og vaxandi ruslahauga heimsins og þverrrandi auðlindir vegna þessa lífstíls. Hins vegar mjög tengt fyrirbæri, þessi persónuleiki sem kallaður er hnakki, sem er svo útlitssinnaður að yfirborðsmennskan yfirtekur allan persónuleikann sem ekki er fær um að setja sig í spor annara. Og á sama tíma er tjáningin einskorðuð við einhæfðan og fordómafullann orðaforða og viljandi ranga málnotkun til að virka töff og flottur á allann hátt, s.s. yfirborðsmennska út í gegn.

föstudagur, september 15, 2006

Föstudagur

Ósköp var síðasta færsla neikvæð, ekki að furða að fólk athugi hvort það sé ekki allt í lagi með mig. Jú jú ég er í lagi.
Tók heldur betur til í símreikningunum í vinnuni, sá símanúmer sem enginn kannaðist við og lét loka þeim. Komst svo að því að annað var vegna adsl tengingarinnar okkar, s.s. ég lét loka fyrir netið og eins og gerist og gengur tók það heila viku að fá þetta í lag aftur. Hreinlega skelfilegt ástand. Þess utan er ég búin að missa nettenginguna heima hjá mér líka, stundum kemst ég á netið og þá helst bara inni á baði. Mér finnst það bara ekki gaman að sitja á klósettinu með lappann svo ég nenni þá yfirleitt ekki á netið.
En nú er ég farin að fara meira út á meðal fólks hér í sveitinni, er komin í kór... he he,nýstofnaðan sjúkrahússkór.
En nú er föstudagur og ég er farin til Reykjavíkur til að vera yfir helgina.

fimmtudagur, ágúst 24, 2006

þreytt

Ég er alveg ónýt, ógeðslega þreytt, sef illa, er kannski að taka vinnuna með mér heim sem er ekki nógu gott, það gerir mig veika.

þriðjudagur, ágúst 22, 2006

húðlöt

Ég verð eiginlega að viðurkenna að ég er húðlöt, ég hafði hugsað mér að skrifa ferðasöguna niður hér, sérstaklega sjálfrar mín vegna svo ég gleymi engu. Ég hef ekkert gert að viti þegar ég er ekki að vinna hangi ég yfir sjónvarpinu, nenni eiginlega hvorki að taka til né gera nokkuð annað að viti. Um helgar fara 6 tímar í akstur og restin í að gera eitthvað meira af viti en ég geri í vikunni.
Ástæðan fyrir því að ég ákvað að skrifa nokkrar línur núna er að ég var að lesa Spiegel Online og fannst algjört æði að sjá að sama umræða og á sér stað hér á sér stað þar. Það er gagnrýni á ofurlaun stjórnenda ég er ekki búin að lesa alla greinina enda er ég í vinnuni og bara renndi svona aðeins yfir hana. Líkar afskaplega vel tónninn í henni um óeðlilega miklar kauphækkanir stjórnenda stórfyrirtækja á verðbréfamarkaði, hækkanir sem ekki er hægt að réttlæta. Það má kannski minna á Enron og fleira í BNA sem átti rót sína í árangurstengdum rosalaunum sem voru hvatning til stjórnenda til að falsa bókhald til að allt liti mikið betur út og launin með.

mánudagur, júlí 24, 2006

Fyrsta heimsóknin

Fyrst í heimsókn til mín hingað norður(fyrir utan Röggu og Steinar sem hjálpuðu mér að flytja) er hann Torfi systursonur minn frá Svíþjóð ásamt spúsu sinni Súsönnu og foreldrum hennar. Sem sagt ég er með fullt hús svía eins og er. Nú er ég í vinnuni á meðan þau skreppa í dagsferð á Akureyri og Mývatn. Þegar ég kem heim ætla ég að hafa grillið til svo að við getum grillað um leið og þau koma aftur úr þessari ferð.
Á morgun fara þau svo í suðurátt, og taka Snæfellsnesið í leiðinni.

sunnudagur, júlí 16, 2006

Netheimar

Ég var að lesa bloggið hennar Ástu úr saumaklúbbnum, þar sem hún talar um 10 hluti sem hún elskar. Þar á meðal að lesa bloggsíður. Ég neyðist til að viðurkenna að ég geri soldið af því líka. Það er fyrst alltaf ákveðinn blogghringur, þau blogg sem ég kýkji á reglulega, vinir kunningjar. En svo kýkir maður á nagportal.net og uppgvötvar margar síðurnar þar. Þar hef ég fundið bloggsíður fólks sem ég hef einhvern tímann eytt tíma með á æfinni. Séu það gamlir vinir, vinnufélagar eða skólasystur eða -bræður sem maður er ekki í neinu sambandi við lengur, kannski ekki séð í 20 ár. Merkilegur andskoti þessi netheimur. Allt í einu er maður að lesa um líf fólks sem maður hefur kannski einhverntímann þekkt eða aldrei þekkt, stundum hef ég það á tilfinningunni að ég sé að njósna. Þessum blogglestri fylgir svolítil sektarkennd, líkt og þegar sést hefur til manns að lesa "Séð og Heyrt" nú eða DV. Maður á ekki að lesa þetta segir samviskan. En á móti kemur að það sem birtist á bloggsíðum er með vilja fólksins gert, það er sjálft að birta þetta, annað en það sem stundum er gert í öðrum miðlum. Þetta hljómar kannski undarlega fyrir þig, að lesa þessar vangaveltur á bloggsíðu. Þversögn kannski, en á móti kemur að síðan þessi er ekki á neinum lista, ekki hjá blogger eða á nagportal. Auk þess er ekki svo auðlæsilegt fyrir aðra en þá sem þekkja mig hver skrifar hér. Þess vegna finnst mér ég vera örugg þó auðvitað er það enginn á þessu sviði. Ég er ekki alveg á útopnu hér, heldur er um að ræða þrengri vettvang en hjá flestum. Auk þess sem ég er ekki að deila hverri einustu gjörð eða hugsun með lesendum. Nú hljóma ég eins og ég sé að réttlæta sjálfa mig útfrá þessum pælingum mínum, þannig hefur vopnið snúist í höndunum á mér. Þetta var Sunnudagshugvekjan mín, nú má "Húsið á sléttunni" byrja.

fimmtudagur, júlí 13, 2006

hmmm

Er bara ekki í mínu besta formi, líður ekki vel. Er leið, sár og sorgmædd og einmana.
Sjáum til hvernig líðanin er á morgun, nú er einn hápunktur vikunnar framundan, Despo húsfrúrnar eftir 10 mín.

hitt og þetta

jæja, enn og aftur kominn fimmtudagur. En núna ætlaði ég að vera hér fyrir norðan í fyrsta skifti yfir helgi. Það er bæjarhátíð hér í bæ þessa helgi. Maður verður nú að taka þátt í lífinu í sveitinni til að komast inn í hlutina. Ég átti von á að fá heimsókn líka yfir helgina, en það datt upp fyrir. Mamma og vinkona hennar ætluðu að koma yfir helgina, en mútta var plötuð í vinnu þessa daga svo hún kemst ekki fyrr en á sunnudag. Aldís ætlaði að kýkja en það datt uppfyrir líka. Svo nú er ég á báðum áttum, ég held ég verði hér samt sem áður sama hvort ég fæ einhvern til mín eður ei.
Ég uppgvötvaði það síðustu helgi að ég var ekki farin að íhuga fatnað fyrir ferðina mína, hvað þá kjól fyrir brúðkaupið. Úpps, ég vil endilega vera í fallegum kjól í þessu brúðkaupi, ég get ekki verið í buxum, það er allt of heitt, stuttbuxur eru ekki inn í dæminu, allt of hvunndagslegt. S.s. ég fór á stúfana síðustu helgi og tók við að leita að kjól, fann flotta kjóla sem ég mátaði, því miður þá pössuðu þeir allir ekki yfir brjóstin þó þeir virtust passa að öðru leiti. #$&grr. *#$%&grrr.
Ég einblíndi svo mikið á það að finna kjól að ég íhugaði ekki pils og topp. Ég hefði svo sem átt að vita þetta, ég er einu númeri stærri á efri partinn. Svo ég keyri kannski í næstu bæi hér fyrir norðan og ath hvað búðirnar hér hafa upp á að bjóða á laugardaginn.
Nú skín sólin og mér leiðist að sitja inni á skrifstofu og það alein enn einn daginn. En nú verð ég að gera eitthvað af viti og vinna eitthvað.

fimmtudagur, júlí 06, 2006

Fimmtudagskvöld

Það er komin rútína í fimmtudagskvöldin hjá mér, taka saman þvott,pakka og þrífa. Ég á ósköp erfitt með að sjá fyrir hvað mig vantar fyrir helgina. Ég er ósköp óákveðin, hvernig föt þarf ég, hvað ætla ég að gera um helgina? Alltaf sama spurningin. Ég hef alltaf átt við þetta vandamál að stríða, allaf vantar mig það sem ég pakka ekki niður. Sama hvert ég fer. Jæja á meðan ég fer með þvottinn suður hverja helgi er ég alltaf með meira með mér en ég þarf á að halda. Hvernig fer fyrir mér þegar ég verð komin með þvottavél hérna? Kannski ég kýki á útsölur í bænum um helgina. Mig vantar skó, braut hæl af einum síðustu helgi. Svo þarf ég að hugsa um fatnað fyrir sólarlandaferðina mína, he he. Ég á barasta engin alvöru SUMARFÖT, hvenær þarf ég þau hér svo sem.

þriðjudagur, júlí 04, 2006

voða gaman

jæja það verður að segjast að það er erfitt að leggja niður gamlan vana. Ég skil ekki af hverju ég er alltaf að fara inn á Starfatorg, Mannafl og aðrar síður sem ég var alltaf að skoða í atvinnuleit. Ég skoða ekkert inni á þessum síðum lengur, ég bara gríp mig við það að opna þessar síður og hálf skammast mín og flýti mér þá til að fara á aðrar síður rétt eins og ég hefði verið gripin við að skoða klámsíður.
Sannleikurinn er sá að ég er ánægð með vinnuna mína, hún er fjölbreitt og það er margt nýtt og spennandi sem ég kynnist í þessu starfi. En ég er langþreytt, það er ekki gaman að flytja, það getur verið erfitt að flytja án þess að vera undir það búin. Ég var s.s. ekki búin að vera að pakka dóti í margar vikur áður en ég flutti heldur var bara farið í næstu viku eftir viðtalið. Og nú er ég búin að vera að standa í flutningum um helgar síðustu 7 vikur. Auk þess að leita mér að bíl um helgar líka, nú verð ég að fara að klára þetta dæmi. Það þarf að mála og laga einhverja hluti í íbúðinni minni í bænum, auk þess að þrífa hátt og lágt, finna leigjanda, helst einhvern sem ég eða önnur traustsins verð manneskja þekkir eitthvað til. Svo þarf að finna geymslu til leigu fyrir það sem ekki fékk að fara með norður.
Þetta ætlar engan enda að taka þetta vesen. En allavega mér tókst að finna mér bíl um síðustu helgi og keyri nú um á Subaru station bíl, það varð nú að vera 4hjóladrifinn.
Ég er nú eins og áður sagði frekar þreytt og ekki í mínu besta ástandi hvað það varðar. Ílla sofin er ég bara hálf manneskja, hef ekki þurft að lifa mánuðum saman á 3 tímum á nóttu vegna ungabarns eins og margur annar, og ætti því ekki að vera að kvarta. En ég komst að því í nótt hvað var að trufla svefnfriðinn hjá mér. Ég sef alltaf við opinn glugga og er vön umferðarlátum og hvaðeina. En ég er ekki vön því að mávager sé að garga fyrir framan gluggann um miðjar nætur og vekja mann þannig. Ég var líka aldrei hrifin gæsunum í sem hafa vakið mig á morgnana um helgar undanfarna vetur. En þær voru í það minnsta aldrei að birtast um miðja nótt.
Verst þykir mér hvað þetta svefnleysi fer á taugarnar hjá mér sem svo slær á magann sem verður þess valdandi að ég get ekki drukkið kaffi, sem er þess valdandi að það er erfitt að halda sér vakandi þegar maður á að vera vakandi.
En magans vegna er þá kaffið sett á pásu í einhvern tíma og hugað er að betri næringu og helst hreyfingu líka, ef maður væri ekki svona latur. ;0(

mánudagur, júní 12, 2006

jæja langt er síðan ég skrifaði síðast

Og margt hefur átt sér stað, núna set ég inn líka færslu sem ég hafði skrifað 10 maí en vildi ekki birta fyrr en ég væri búin að segja ýmsu fólki fréttirnar í eigin persónu.
Um miðjan Maí byrjaði ég í nýju starfi sem Félagsmálastjóri á Blönduósi. Það er sem sagt mikið að gerast í einu. Ekki bara ný vinna heldur flutningar í leiðinni, flutningar landshornanna á milli. Ekki er nein íbúð á lausu á Blönduósi svo ég er flutt til Skagastrandar. Hér bý ég í 90 fm. raðhúsi, sem er satt best að segja alltof stórt fyrir mig eina.
Ég segi það satt að ég hata flutninga, að flytja lengra en innanbæjar er soldið meira mál, líka ef maður er í fullri vinnu á meðan. Svo allt gerist um helgar. Ég er ekki góð í að pakka, ég held að næst þegar ég flyt er ég með það á hreinu að það gerist með meiri fyrirvara svo ég geti skipulagt allt fyrirfram og tekið mér tíma í þetta.
Ég get ekki endað þetta á þessum neikvæðu nótum, ég er bjartsýn á framtíðina, þetta verður mjög spennandi reynsla. Að læra eitthvað nýtt, spennandi starf sem býður mikla möguleika á að þróa sig áfram. En ég get ekki tekið MBA námið sem ég hafði verið að spá í, en á móti kemur að ég er núna að spá í nám í stjórnsýslu, sem myndi nýtast mér í starfinu og hægt er að taka það í fjarnámi. Í næsta húsi við mig myndi nýtast mér við það nám.

miðvikudagur, maí 10, 2006

grrrr

Tölvur eru tæki djöfulsins, þolinmæði mín gagnvart þeim er mjög takmörkuð. Svo ég skýri þetta aðeins betur, í tilefni af nýju vinnuni minni og tilheyrandi flutningum á Blönduós, keypti ég fartölvu í gær. Og hún er eflaust gölluð, því hún er ekki að ganga, frýs í sífellu, ég get ekki gert nokkurn skapaðann hlut. Ég er ekki komin langt í að setja inn á hana allann nauðsynlegan hugbúnað, hún byrjaði að láta svona þegar ég setti vírusvörnina inn. En góðu fréttirnar eru þær að skanninn sem ég keypti líka í gær, er alveg að gera sig, áður en ég setti inn vírusvörnina og allt fór fjandans til setti ég upp skannann og var hún mjög fljót að setja upp meðfylgjandi hugbúnað, yndislegt. Skanninn er mjög einfaldur í notkun, þarf ekkert rafmagn annað en um USB við tölvuna, s.s. bara ein snúra. Og snilldin ein, hann skannar filmur, sem ég mun dunda mér við á næstunni í mínum litla frítíma.

föstudagur, maí 05, 2006

persónuleikapróf

Ég var í atvinnuviðtali á Blönduósi í gær, í dag tók ég persónuleikapróf vegna þessa starfs á netinu. Ég verð að gera upp við mig hvort þetta starf sé það áhugavert að ég vilji það, bjóðist mér það, spurningin er vil ég flytja? Vil ég starfið því það stendur til boða, bara til að fá vinnu eða hef ég áhuga vegna þess að ég hef áhuga á starfinu sjálfu? Ég verð að gera það upp við mig.
To be or not to be?

miðvikudagur, apríl 12, 2006

hæ hæ

Ég er að fara í ferðalag júhú, ég fer eftir 9 daga til Glasgow til að heilsa upp á hana Lindu elskuna. Mikið hlakkar Ausu litlu til. Það verður nú gaman að sjá kelluna á núverandi heimavelli, ég hef nefnilega ekki heimsótt hana þarna úti ennþá. En greiið hún samt ný laus við páskaheimsóknirnar og þá fær hún mig til sín. Hehe ég verð hvort eð er sett inn í hvar hlutirnir eru og látin bjarga mér sjálf svo ekki held ég að það þurfi að hafa mikið fyrir mér hmmm. Svo er aldrei að vita nema að frúin versli ekki eitthvað smá hmmm.
Kannski ég taki fataskápin í gegn hann er hvort eð er fullur af fötum sem ég nota einhverra hluta ekki, hmm. Stundum er þetta bara svona, maður hélt að maður fílaði e-ð eða það var svooo ódýrt að maður hlaut að nota þetta einhvern tímann.... bleh, ekki er öll vitleysan eins. Nú er mottóið USE it or LOOSE it.

laugardagur, apríl 01, 2006

1 apríl

Ekki er ég mikið búin að grínast í fólki vegna dagsetningarinnar.
Ég er líklegast bara of leiðinleg til þess. Hér koma þau aprílgöbb sem ég hef orðið vör við.
- 9 ára frændi minn, sagði á msn í morgun að hann væri á leið í jarðaför hjá vini sínum.
- Rúv segir í fréttum sínum að Sylvía Nótt fái ekki að taka þátt í Júróvision, því evrópska samband sjónvarpstöðva hafi kvartað vegna "lekans".
- Ein úr saumaklúbbnum segir á bloggsíðu sinni að hún hafi selt íbúðina sína á metverði.

Ég hef bara legið yfir enskunni í dag, hef alltaf verið of löt til að gera mitt eigið handrit að Gullfoss og Geysis ferðinni á ensku, ég er ekki hrifin af handritinu sem ég fékk frá skólasystur minni á sínum tíma. Fer í GG á morgun með kana, þannig að ég kann þetta ekki utanað eins og á þýskunni, sérstaklega allar mælieiningar á ameríska vísu.

Þetta er svo mikil vinna, ég var alveg búin að gleyma því. Ég vildi að enskan væri jafn fljótandi og þýskan, þar sem ég þarf varla að hugsa til að finna rétt orð. Kannski ég ætti að gerast au pair í skotlandi í nokkra mánuði hehe.

miðvikudagur, mars 29, 2006

Busy woman

Það er alltaf eins, annað hvort í ökkla eða eyra, allt sem ég tek að mér að gera skal alltaf raðast á sama tímann. Í gær var ég upptekin frá 8-24 s.s. mikið að gera og sama er í dag. Það skánar aðeins á morgun en ég er orðin þreytt núna.
Það sem er að gerast hjá mér er vinna, bæði HS og leiðsögn, góðmennska þ.e. aðstoða ættingja við skattskýrslugerð og flutninga, saumaklúbbur(var gaman í gær)próf , skýrslugerð og þess háttar hjá FL þar sem aðalfundur er í kvöld, júhú ég er að hætta öllum stjórnarstörfum, en er samt búin að lofa mér í ákveðin sjálfboðaliðastörf fyrir félagið samt, "I cant help it", (það er reynsla sem mun borga sig). Og svo náttúrulega einhverjar umsóknir og ofsóknir af minni hálfu þeirra vegna. Kannski fæ ég smá tíma til að slaka á næstu daga þar sem dagskráin er ekki alveg eins þétt. Mútter frétti af norðanáttinni hér heima og framlengdi dvöl sinni á Kanarí um eina viku, gott hjá henni.

föstudagur, mars 24, 2006

Júróvisíon

Nú er myndbandið og enska útgáfan af Sylvíu Nótt komin á netið.

Orðabók

Orðalag er eitthvað sem gaman er að leika sér að, í blaðinu Birtu í dag sá ég orðalag sem minnti mig á Bridget Jones. Hún talaði nefnilega um einhleypinga sem singletons, man ekki hvað hún kallaði pör. Allavega í þessum pistli var talað um Lausalinga og Paralinga, gífurlega flott orðalag.

Mútta var um daginn að versla fisk, fisksalinn vildi endilega selja henni meiri fisk en hún vildi. Svo hún lét hann vita að hana vantaði bara einmennings ýsu. Þetta þótti honum stórfyndið. Verð að muna að nota þetta, einhvern daginn.

"what are you wearing?"

Mig rak í rogastans við að lesa fyrirsögnina "þriðji hver breti talar nakinn í símann" sem kom fram í mbl. um daginn.
Ég velti fyrir mér hver aðferðafræðin er, á bak við þessar niðurstöður. Hvernig hljómar spurningin, og hverjum í ósköpunum datt í hug að spyrja um nekt í þessu samhengi? Er ekki líklegt að fáir hafi tekið þessa spurningu alvarlega og ákveðið að grínast aðeins. Mér finnst það harla ólíklegt að það sé þjóðarhreyfing fólks í Bretlandi sem fer úr fötunum til þess að hringja símtal. Eða gengur nakið um heima hjá sér meirihluta dagsins. Mér finnst það ósköp eðlilegt að það komi fyrir að fólk sé nakið þegar síminn hringi, en eins og þetta er sett upp hljómar það eins og fólk fari úr fötunum til þess að hringja.....hver hefur svo sem ekki hlaupið úr sturtunni til að svara í símann, nú eða rúmminu....
Ætli þeir hafi spurt fólk að því hvort það tali í símann á meðan það situr á klósettinu.... Er það ekki spurning sem brennur mikið frekar á okkur...því þar á að draga mörkin....
Nú er komin ný merking á bak þessarar klassísku spurningar í símtölum fólks í bíómyndunum "What are you wearing" (b.t.w. ég hef aldrei verið spurð að þessu).

miðvikudagur, mars 22, 2006

Heilsan

mér líður ílla, ég hélt í gær að ég væri að fá flensu. Reyndar er ég ekki komin með flensuna ennþá, en mér líður samt ílla. Er með beinverki, sem hefur nú komið fyrir mig áður, að ég fengi eingöngu beinverki, ætti að láta athuga þetta. Hausverk er ég líka með, en engann hita eða kvefpest svo ég er í vinnu.

þriðjudagur, mars 21, 2006

Í dag

Mamma er á Kanarí og ég er á bílnum hennar, sem er fínt hann er miklu betri enn minn bíll en samt er það ekki alltaf gott að vera á sjálfskiptum, hmm.
Dagurinn byrjaði ekki glæsilega hjá mér í dag. Því ég dreif mig af stað, fattaði svo að ég þyrfti að dusta snjó af hliðarrúðunni vinstra megin, dreif mig úr bílnum gleymdi alveg að hann var í drive og bíllinn af stað ég hálf út úr bílnum og hurðinn lokaðist ekki, læsingin hafði frosið í nótt og ætlaði ekki að lokast.

Samkvæmt Mbl. er stjörnuspáin mín í dag eftirfarandi:
"Samskipti geta verið snúin. Það eru svo margar nýjar reglur upp á síðkastið. Ekki hafa áhyggjur. Drekinn er eins og alheimsfjarstýring og passar í hvaða aðstæður sem er. Hann getur meira að segja haft áhrift með því að ýta á takka á réttu augnabliki." Mér finnst þetta vera hálfgerð hæðni þar sem ég er að leysa af á skiptiborði þessa dagana. Og þó ég sé bara hálfan daginn í þessu er í nægu að snúast, í gær rauk ég héðan suður í HÍ með umsókn um starf sem ég er soldið spennt fyrir og svo þaðan í Mörkina þar sem ég var á fundi stjórnar Fagdeildar Fl., lokaspretturinn áður en ég er alveg hætt. Og var þar til kl að verða 7. Í dag verður álíka sprettur, fer héðan í prentun að ná í fréttabréf, skutla því á skrifstofuna, svo heim að taka til því móðursystir mín kemur svo kl 2 því mamma bauð mig fram í að hjálpa henni með skattskýrsluna. Að því loknu hvenær sem það verður fer ég svo á skrifstofu Fl. til að vesenast í tölvunni þar.
Á morgun er ég svo eftir hádegi að skrifa texta og umsóknir fyrir Sari. Hmm sem stendur er eins gott að ég er ekki í 100% vinnu.
En þetta fer nú að breytast, ef allt gengur eftir og ég kemst í vinnu og MBA þá mun ég þurfa að segja nei við alla, tek bara að mér smá greiða sem lítinn tíma taka.
Reyndar þó ég hafi ákveðið að hætta í öllum stjórnarpakkanum þá fékk ég þá hugmynd í gær og bauð mig fram í að skrásetja bókasafn félagsins og búa til gagnabanka í þeim tilgangi. Ég hef alltaf ætlað mér að kynna mér Access betur, en ég hef þurft verkefni til þess að drífa mig í það. Ég ætla nú samt ekki að vera í þessu í óendanlegan tíma, ég set mér ákveðin mörk í þeim tilgangi.
Ég sef ansi ílla þessa dagana, er alveg drulluþreytt alla daga. Kannski er heilsan aðeins að gefa eftir, það eru allir veikir allstaðar, flensa í gangi allstaðar. Mér er íllt í bakinu sem er nú sjaldnast flensueinkenni en kannski er það bara hreifingarleysið, ekki ólíklegt hmm.

fimmtudagur, mars 16, 2006

Stjörnuspekisálfræði??

Ekki er ég alveg búin að ljúka mér af um þetta málefni.

Nú er ég búin að kýkja á viðtalið í heild sinni á netinu. Ég er líka búin að skoða heimasíðu hennar. Þar kemur fram að hún hafi BA úr félagsvísindadeild HÍ, en ekki hvaða grein hún hafi lagt stund á. Og síðar lagði hún stund á nám við "The Centre For Psychological Astrology? Það er sem sagt þaðan sem hugtakið kemur.
Við nánari skoðun virðist þetta vera ákveðin stefna í stjörnuspeki.

Að því að mér sýnist er annars vegar til stjörnuspeki sem spáir í framtíð manna, það er þessi sem við þekkjum úr dagblöðunum. Og svo hins vegar er þessi stefna sem einbeitir sér að því skoða persónuleika hvers og eins. Sem er gott og vel í sjálfu sér, ég væri hlynntari því að þetta kallaðist Persónuleikastjörnuspeki heldur en að Sálfræði sé bendluð við þetta.

Þó svo að þessi stefna hallist að kenningum ákveðins sálfræðings fyrri tíma, Jung....Oftast er greint á milli sálfræðinga og sálkönnuða, þ.e. Freud/Jung grundvölluðu sálkönnun (Psycho analysis),sem kannski telst vera ákveðin stefna innan sálfræðinnar, en í raun eru mjög fáir sem leggja stund á sálfræði sem hallast undir hana því er gerður greinarmunur á könnun og fræðum.

Mér er hreinlega illa við að einhver kalli sig sálfræðing þó með öðrum formerkjum sé, án þess að hafa gengið í viðurkenndan háskóla í fjölda ára til að nema fræðin á grundvelli vísindanna.

Ég kýkti á heimasíðu skólans og virtist þetta nám byggjast upp á eins dags og helgarnámskeiðum einhverskonar.

Ég hef ekki mikið fylgst með íslandi í bítið eða íslandi í dag, hef svona fylgst með með öðru auganu eða eyranu. En nú sýnist mér í fljótu bragði sem að munurinn sé í sjálfu sér sá að í bítið sé gagnrýnislaus magasín þáttur með léttu yfirbragði á meðan í dag taki á málunum með meiri gagnrýni. Kannski ég fari að skoða þetta betur.

Sálfræðistjörnuspeki

Áður en ég fór í vinnu í morgun (afleysing á skiptiborði HS) heyrði ég aðeins í Íslandi í bítið. Ég náði ekki að hlusta á allt viðtalið en það var við konu sem vann við sálfræðistjörnuspeki. Ég leyfi mér aðeins að efast um að konan hafi lagt stund á nám í sálfræði. Ég náði ekki að fylgjast með þessu til enda, ég á eftir á kýkja á þetta á netinu svo ég geti tjáð mig um þetta að viti.

Að mínu viti er sálfræði og stjörnuspeki hreinasta þversögn við hvort annað. Samkvæmt öllum vísindum sálfræðinnar mun stjörnuspeki tilheyra hindurvitnum og hjátrú og öllum þeim er lagt hafa raunverulega stund á sálfræði ætti því að bregða við það að sálfræði sé skeytt saman við stjörnuspeki.

Það þýðir ekki að ég líti ekki í stjörnuspánna mína daglega. En það er af og frá að fræðigrein þar sem vísindaleg vinnubrögð eru viðhöfð eigi samleið með einhverju sem byggist á trú frekar en vísindalegum vinnubrögðum.

mánudagur, mars 13, 2006

Skattaskýrsla

Það er orðið svo mikið auðveldara að gera skattaskýrsluna nú orðið þegar allt er meira og minna forskráð. Nema ef maður er ekki að passa upp á pappírana sína, forskráningin er röng og maður hefur haft tekjur frá mörgum stöðum yfir árið, ef maður passar sig ekki endar maður á því að borga meiri skatt en þörf er á. Ég hélt að allt væri komið og villuprófunin sýndi að engar villur væru, þá skellti ég útreikningnum á og brá allsvakalega við það. Einhverstaðar er skekkja því ég borgaði tekjuskattinn minn og rúmlega það, ég hélt ég ætti að fá endurgreitt, en nei ekkert slíkt nú verð ég að fara yfir allt sem er forskráð og finna villuna.
þetta er ekki eins auðvelt og þetta ætti að vera.
kv.
Auður

fimmtudagur, mars 09, 2006

Svartur dagur

Ég hafði hugsað mér að nýta daginn vel, koma mörgu í verk helst til þess að ég hugsaði ekki of mikið. En ég held varla að mér verði mikið úr verki í dag. Það er nefnilega nákvæmlega 1 ár í dag síðan elskuleg systir mín lést. Ég er með tárin í augunum og get ekki séð að ég geri mikið af viti í dag.
En ég verð örugglega að minna bræður mína á daginn svo þeir hafi samband við mömmu og Ingólf. Þeir muna þetta örugglega ekki á sjálfsdáðum.
Ég pantaði blóm á Interflora á netinu til að senda til Svíþjóðar, þá fær hún blóm frá okkur í dag.
Á morgun er nýr dagur, vonandi............

Leyndir hæfileikar, ég sem hélt þetta vera augljóst, hmmm

Your Hidden Talent

You have the power to persuade and influence others.
You're the type of person who can turn a whole room around.
The potential for great leadership is there, as long as you don't abuse it.
Always remember, you have a lot more power over people than you might think!

þriðjudagur, mars 07, 2006

Framtíðarplön!!??

Jæja ég get ekki djöflast áfram í þessum hjólförum, ég verð að koma einhverju skikki á líf mitt. Atvinnuleit að eilífu er ekki að gera sig ég verð að taka þetta í eigin hendur á einhvern hátt. Og það sem ég kann betur en að láta ráða mig í áhugaverða vinnu er að fara í skóla. Ég hélt að M.A. myndi tryggja mér vinnu einhverstaðar en það gerir það ekki, alla vega ekki M.A. í félagsfræði.
Mér finnst ég komin í hálfgerða sjálfheldu eftir u.þ.b 5 ára atvinnuleit meira og minna. Ég er nýkomin af námskeiði í verkefnastjórnun, sem sagt praktískt námskeið sem vonandi gerir mann aðeins gjaldgengari í störf verkefnastjóra.
Ég held ég láti ekki þar við sitja, ég er að íhuga að taka MBA nám með vinnu, sem ég er enn að leita að. Þar fæ ég þennann praktíska vinkill á námsferilinn, viðskiptatengt. Bölvanlegt en ég neyðist til láta undan markaðnum, atvinnumarkaðurinn krefst viðskipta eða verkfræðimenntunar af svo til öllum. Mamma stakk upp á að ég færi að ná mér í kennsluréttindi, ég held nú síður (ekki taka þessu ílla elsku kennarar í mínu umhverfi) ég vil ekki fara aftur í skóla til þess eins að vera í láglaunastarfi (þ.e. miðað við menntunarstig í það minnsta), maður þarf að vera með hugsjónina, mín er ekki á því sviði.

Ég hef nú samt velt því fyrir mér, ég hef líka velt fyrir mér: þýðingafræði,MPA(meistaranám í stjórnsýslu), MPM (meistaranám í verkefnastjórnun), meistaranám í Fjölmiðlafræði, félagsráðgjöf, náms og starfsráðgjöf.

Ég er búin að tapa nægum tíma vegna eigin aumingjaskaps, búin að vera láglauna meir en nógu lengi. Eina leiðin til að fara að fá uppskeru er að ráðast á garðinn þar sem hann er hæstur, stefna á hálaunastörfin með því að greiða himinhá skólagjöld fyrir 2 ára nám fyrir viðbótargráðu við M.A. gráðuna mína, þá yrði ég með MBA.MA eða MAmba.

Ég er í dag að vinna í afleysingu á skiptiborðinu í HS, mér leiðist það alveg afskaplega, en það er bara 1/2 dagur svo ég lifi það af. En sé fram á að vera í þessari afleysingu í 2 vikur frá 15 Mars. Ágætt að hafa smá vinnu því ég er ekki skráð í neina ferð á þeim tíma. Vonandi nægur hvati til að hamast meir í atvinnuleitinni.

Nú verð ég að láta hlutina gerast því ekki gerast þeir sjálfkrafa.

Motto dagsins er ekki nýtt á nálinni hjá mér en á sérlega vel við.
Action instead of Reaction ég hef ekki getað þýtt þetta á sómasamlegan hátt sjálf svo þetta verður að vera á ensku.

miðvikudagur, febrúar 15, 2006

íslensk mannanöfn í dag hmmm

Bekkjarafmælið
Ósk Ýr gekk rösklega með Branda Ara í afmælið til Egils Daða því hún var að verða of sein að sækja Leif Arnar og Loft Stein í leikskólann. Borgar Vörður, pabbi Egils Daða, tók á móti þeim.
Þarna voru Lind Ýr, Líf Vera, Sól Hlíf og Hreinn Bolli. Erlendur Hreimur kom blaðskellandi innan úr stofunni og vinkonurnar Vísa Skuld og Dís Ester fast á hæla honum. Mýra Þoka lét lítið fyrir sér fara úti í horni. Innan úr herbergi Egils Daða bárust ógurlegir skruðningar ? ?#%=&#$&/(=!z#$!/!=! Línus Gauti, Barði Vagn og Mist Eik voru greinilega mætt. En hvar var Ríta Lín?
Fyrir utan var Sædís Líf í rauðum fólksvagni. Hægt og sígandi nálgaðist Jökla Þoka eftir stígnum. Hún var orðin alltof sein í afmælið

föstudagur, janúar 27, 2006

Viðtal

Viðtalið var ok, maður veit aldrei hvernig þetta hefur verið. Ég vil ekki velta mér upp úr þessu núna, ég veit allavega að ég gerði/sagði ekkert sem ég get verið að ásaka sjálfa mig fyrir. Ég var fín, ekkert ef bara, hefði eða þess háttar, ég var í viðtali og það var fínt, það kemur í ljós í þarnæstu viku hvað úr þessu verður.
Núna er bara að fara í ríkið og pakka fyrir sumarbústaðaferðina mína á eftir. En mikið ósköp er ég þreytt í augnarblikinu, svaf ílla í gærnótt, hef almennt ekki sofið vel undanfarið, alltaf að vakna,líklega er hávaðinn í ísskápnum meiri en ég hélt, truflar meir en mig grunaði, þarf að skipta um ísskáp líka, jii ég hef ekki efni á því að anda. Líklega verð ég að sleppa því að fá mér nýtt sjónvarp og líka ísskáp, verð sjónvarps og ísskápslaus hérna, ekkert svona negatívt tal, nú er bara að skella sér í sukkhelgi saumaklúbbsins.

fimmtudagur, janúar 26, 2006

I like you

Viðtal

Ég fer í viðtal í fyrramálið kl: 8:30, ég er mjög spennt fyrir þessu starfi í stofnun hér í bæ, meira um það seinna, ég bið um fallegar hugsanir á þessum tíma í fyrramálið. Hef hugsað mér að vera vel undirbúin, fara í gegnum þessar klassísku spurningar með sjálfri mér, ákveða einhvern ramma fyrir svarmöguleika. Líka muna eftir því sem ég hef hugsað mér að spyrja sjálf.

Að öðru leiti verður þetta góð helgi hjá mér, ég fer í sumarbústað með saumaklúbbnum seinni partinn á morgun, verður það hreinasta sukkhelgi. Það verður étið, drukkið, spilað, hlegið og skellt sér í pottinn.

Hvað lífið getur verið dásamlegt á stundum, hehe.

mánudagur, janúar 23, 2006

Sjónvarpsleysi framundan ??

Sjónvarpsgarmurinn minn er farinn að slökkva á sér sjálfur, með æ styttra millibili.
Í morgun slökkti það á sér 2x á einum klukkutíma( kannski var ísland í bítið bara svo lélegt?). Og samtímis kom óyndisleg lykt sem fékk mig til að halda að það myndi brenna yfirum. Ég rétt þorði að setja það í gang nú í kvöld, ég skammta mér sjónvarpstíma, út frá skemmtilegasta sjónvarpsefninu. En ég sé fram á að það eigi eftir að deyja innan skamms. Ég er viðbúin því og tilbúin að stökkva eftir slökkvitækinu.
Ég er búin að ákveða að kaupa ekki strax nýtt sjónvarp, reyna að vera sjónvarpslaus um tíma, sjá hvort ég finni ekki framkvæmdagleðina í sjálfri mér, fari meira í heimsóknir, bæði til að kýkja á einstaka dagskrárliði og til að hitta fólk.
Hver veit nema að það verði mér bara til ánægju að verða sjónvarpslaus.
Verst að ég verð að passa strákana hans Hlyns bróður míns þarnæstu helgi, þeir yrðu ekki ánægðir með að vera sjónvarpslausir á meðan, kannski ég fái lánað sjónvarp hjá þeim hingað heim á meðan.
Næstu helgi fara Hlynur og Sari til Finnlands, Hlynur verður í 2 vikur og Sari í mánuð, mamma verður með strákana en ég hjálpa til og tek þá líklega um helgarnar til að hún fái smá frí. Þeir verða hjá henni í miðri viku því þeir geta gengið í skólann frá henni.

Sóðalegt

Ég legg ekki í vana minn að lesa DV,kaupi það ekki, ekki áskrift né í lausasölu. Þeir eru hins vegar búnir að senda mömmu það ókeypis í 2 mánuði núna, svo ég lít stundum í það hjá henni í leiðindum. Þar hef ég séð ýmislegt sem ég gæti svo sem röflað óendanlega yfir. En það er allt eitthvað drasl sem gleymist strax svo sem, en ég sá einhvern dálk eftir þennan Gillzenegger gæja sem er að trufla mig núna. Helst vegna þess að þetta er eitthvað stærra en bara einhver grein sem birtist einu sinni og hverfur. Þetta er einhver hreifing, stefna sem ég er ekki að fíla. Þessi gæji og fleiri líkir eru komnir með eigin sjónvarpsþætti á Sirkus, sem ég næ hvort eð er ekki heima hjá mér, missi svo sem ekki af neinu. En það er einfaldlega merki um að það er verið að ala þetta upp í liðinu, það virðist vera markhópur fyrir þetta rusl. Ég sé Sylviu Nótt sem góðlátlegt grín að þessu liði, í sjálfu sér þó ég fíli það ekki, þá er augljóst að þátturinn er ekki að taka liðið alvarlega. En þessir svokallaðir hnakkar og fylgilið taka sig og "menningu" sína alvarlega. Sem sést á þessum dálk frá "Gillz". Það að bjóða liðinu eigin þætti er annaðhvort verið að stóla stóran markhóp sem er eitthvað sem hræðir mig, ef þetta er tekið alvarlega sem einhverskonar fyrirmyndir, þá er þjóðfélagið í mikilli hættu. Hins vegar ef verið er að gera grín að liðinu, þá er það sorglegt því ég lærði sem barn að það væri ljótt að gera grín að minni máttar.

miðvikudagur, janúar 11, 2006

mánudagur, janúar 09, 2006

Geðheilsa

Geðheilsa mín er ekki sú besta í augnarblikinu, ég er stressuð og kvíðin. Það er annars vegar atvinnuleitin sem leggst ílla í mig og hins vegar félagsstörf í félagi sem ég er í. Nú mikla ég allt fyrir mér og á erfitt með að gera nokkurn hlut, einföldustu hlutir verða að miklu máli. Þá eru viðbrögð annars fólks við því sem ég geri að valda mér hugarangri, það situr lengi í mér litla barnið sem vildi að allir væru góðir við sig og þolir ekki að aðrir gætu hugsað illa til þess. Þetta er náttúrulega ekki í lagi þar sem ég er ekki týpan sem gerir allt til að þóknast öðrum. Ég get ekki hugsað mér að fara aftur á lyf eins og í eina tíð. En er þá ekki ráðið að fara eftir öðrum hollráðum varðandi geðheilsu, minnka kaffidrykkju, reglulegir matartímar, reglulegur svefn, hreyfing útivera, samskipti og íhugun.
Er að pæla í þessu öllu , en á meðan verður mér ekkert ágengt með þau mál sem ég þarf að sinna.

mánudagur, janúar 02, 2006

Nýtt ár 2006

Loksins er árið 2005 á enda, í mínum huga var það ár "annus horribilis".
Ég var búin að ákveða að hafa einkunarorð mín og áramótaheit fyrir þetta ár einföld og um leið kraftmikil.
Ég trúi og treysti á sjálfa mig, lífið og lukkuna
Áramótaheit að því tagi að breyta einhverju neikvæðu í fari mínu, megrun o.s.frv. hafa ekki borið árangur hingað til, þannig að ég sleppi því. Það er hins vegar í fínu lagi að setja sér takmörk sem maður vill ná. Skrifleg takmörk með ákveðnum tímasetningum, sem hægt er að vinna skipulega að. En ég kalla það ekki áramótaheit lengur, það er hvort eð er alltaf það sama sem maður ætlar sér. Nú er bara um að gera að breyta aðferðinni því þetta hefur ekki virkað svo vel hingað til. Svo það eru einkunnarorð fyrir árið, nokkurs konar mantra sem ég get notað til að auka sjálfstraustið og verið ákveðnari í því sem ég ætla mér.
Vonandi hafið þið öll haft það gott og notið hátíðanna og undir átökin framundan búin, því nú þarf að vinna fyrir öllum jóla/visa/euro skuldunum og öllum hinum aukareikningunum sem koma í upphafi árs.
Fyrsta takmark nýs árs hjá mér er að vera komin í vinnu fyrir lok janúar.
og hana nú.

föstudagur, desember 16, 2005

Smá leiðrétting

Sorry ég bara vissi ekki að Stuart væri líka meyja, nú hefði ég kannski átt að hlusta betur, þar með er þeirri leiðréttingu komið á framfæri.

þriðjudagur, desember 13, 2005

Stjörnurnar segja

Samkvæmt mbl.is í dag 13/12

SPORÐDREKI 23. október - 21. nóvember
Hæfileikar sporðdrekans eru til reiðu. Nú vantar hann bara réttu áheyrendurna - þá sem búa yfir nægri reynslu til þess að nema blæbrigði snilldarinnar. Meyja og fiskur klappa ákaft fyrir þér.

Réttu áheyrendurnir, rétt er það mig VANTAR þá, fékk eitt neitunarbréfið í viðbót í dag, grr. Eina parið af meyju og fisk sem ég þekki eru ekki hér og ekki væntanlegar hingað á sama tíma á næstunni heldur, verð að láta mér Lindu duga hmmm.


samkvæmt spamadur.is í dag 13/12
Sporðdreki (24.okt - 21.nóv)
Þú fellur fúslega fyrir manneskju um þessar mundir sem skilur þörf þína að stjórna, sættir sig við þig og getur skipst á hlutverkum annað veifið en hvort sem þér líkar það betur eða verr þá er allt sem nú er að gerast á þessari stundu afleiðing af vali þínu úr fortíðinni.


Ég veit ekki hvað ég á að halda um þessi ummæli, enda hægt að lesa ýmislegt í þetta, verst finnst mér þetta með valið úr fortíðinni. Ég er að reyna að skapa mér framtíð, fortíðin er liðin, ekki var hvert eitt val vel valið í fortíðinni. Well what the hell.
Er annars að fara í gegnum tónlist á netinu, að finna saman lög í jólagjafapakkana út.
Gerðist líka svo dugleg að baka í gær, he he .
kv.
Ausi

mánudagur, desember 05, 2005

Efnishyggja

Ég spurði sjálfa mig að því hvernig leitin gæti gengið í dag og dró eftirfarandi spil á spámanninum:
XV - Efnishyggja
Hér gæti líðan þín verið óþægileg á einhvern hátt. Reiði, öfund eða afbrýðisemi gæti átt við hér. Tilfinningar þessar ýta ekki undir góða upplifun og eyðileggja alfarið fyrir jafnvægi sálarinnar.

Ef þér finnst enginn endir vera á þessu ástandi er þér ráðlagt að styrkja sjálfið með því að opna fyrir tilfinningagáttir þínar og losa þig úr prísundinni sem fylgir því sem fyrr er nefnt.

Fortíð þín er saga og framtíðin er gjöf sem þú átt að njóta og gefa þig óskipta/n líðandi stund. Leitaðu innra með þér að lausn sem leiðir þig rétta braut í átt að jafnvægi og sátt við sjálfið. Líðan þín er tímabundin ef þú opnar hugann.


Ég ætti held ég að taka síðustu málsgreinina sérlega til skoðunar.
Annars er smá framhald af röfli síðustu daga um málnotkun.
Mér tókst að fara snemma á fætur í morgun, kl 7 (ertu stolt af mér Linda?). Ég þurfti aðeins að skutlast á bílnum, útvarpið var í gangi. Eitthvað fannst mér leiðinleg umræða í gangi svo ég fór á flakk milli stöðva og sá verulega eftir því. Ég heyrði aðeins í útvarpsþættinum Zúber, þar var talað um smákökusamkeppni, ekki óvenjulegt á þessum árstíma. En það sem hneikslaði mig var að útvarpsmaðurinn vildi fá send "demó" af kökum!!! Hvernig í andskotanum dettur manninum í hug að nota þetta orð?? Þetta var ekki óvart, því hann endurtók ruglið. Jafnvel þó hann hefði sleppt því að nota íslensk orð yfir sýnishorn, kynningareintak eða hvað svo sem hann vildi ekki nota, þá er á ensku aldrei notað demó yfir áþreifanlega hluti, það væri þá "sample". Þetta er afleiðing þess að fólk kann ekkert tungumál almennilega hvorki sitt eigið né það sem það slettir með. hmmppf
Annað dæmi nú í morgunsárið var í þættinum "í bítið", þar sem fegurðardrottningin sem nú er þáttagerðarkona í þessum þætti (ég man ekki nafn hennar)var á ferð um Kóngsins Köben. Þar tók hún íslenskann mann tali sem var að opna nýja verslun í Köben, þar spyr hún hvort "Danmerkurbúar" taki versluninni ekki bara vel. Þvílík þvæla, hvað um "Dani"?

miðvikudagur, nóvember 30, 2005

Í tilefni jólaundirbúningsins

Ég var að spjalla við kunningjakonu mína um daginn um jólagjafastressið og þá kom fram sú hugmynd að endurvinna gjafir. Þ.e.a.s. að nýta eigin gjafir sem henta manni sjálfum ekki endilega, í gjafir handa öðrum. Stundum hentar það ágætlega þegar ættingjar þekkja mann kannski ekki næginlega til að vita hvernig smekkurinn er og annar ættingi hefur kannski þann smekk sem aðrir halda að maður hafi sjálfur. En það verður að fara varlega og fólkið má ekki þekkjast of vel svo ekki komist upp um mann. Frétti ég af konu sem vanalega sendi tengdamömmu gjöfina sem mágkonan sendi henni og öfugt. Mágkonan og tengdamamman töluðust hvort eð er ekki við. Eitt árið var hún hins vegar að flýta sér og hafði pakkað inn gjöfunum á nýtt og víxlaði þeim óvart. Þannig að dömurnar fengu aftur það sem þær höfðu gefið henni. Sem sagt það er sælla að gefa en þiggja he he.

Meira af Vísi.is

Eftir að hafa hellt úr skálum reiði minnar hérna áfram sá ég nokkur frekari dæmi þess að ég hljóti að vera betri blaðamaður en þeir sem skrifa nú þegar á visi.
Ef enginn er prófarkarlesarinn, þá má vanda sig.
Mér finnst nú ótrúlegt að enginn starfsmaður á blaðinu taki eftir þessum vitleysum og lagi eftir á, þetta er netmiðill ekki prent það má laga! Þeim er greinilega alveg sama.
Eftirfarandi eru dæmi annarsvegar eitt orð úr fyrirsögn annars vegar heil frétt sem er ómöguleg frá upphafi til enda.

Fellybylir
segir sig sjálft hvað er að hér.

FriðriksKarlsson gítarleikari eftirsóttur í Bretlandi
Friðrik Karlsson gítarleikari úr Messóforte lék inn á tvær vinsælustu plötur í Bretlandi síðustu vikuna. Það var með söngsveitunum Westlife og Il divo. Friðrik er meðal eftirsóttustu gítaleikurum í Bretlandi og sér meðal annars um allaln gítarleik í þætti Simon Cowel, x-Factor, sem er arftaki Idol þátanna í Bretlandi. Friðrik er nú sjálflur að gefa út níundu Feelgood plötuna, sem hann nefnir: Töfrandi. Hann ætlar að fylgja henni úr hlaði hér á landi með tónleikum 4. desember.


hvernig líst ykkur á þetta ?

Háfrónska er mitt mál

Það sem mér finnst vera röng málnotkun er oft að pirra mig "ogslega" . Nýjasta dæmið er fyrirsögn á Vísi.is, "Fólk farið að deyja úr kulda". Sögnin að fara er farin að fara offari í tungumálinu, eins og það sé ekki til önnur sögn, hvurt FER fólkið til að deyja? Nær væri að segja eitthvað álíka og "Fyrstu dauðsföllin vegna kulda" eða nánast hvað sem er annað en að fólk fari að deyja.
Sumir segja að besta leiðin til að aðstoða aðflutta íslendinga í að aðlagast Íslandi sé fyrir okkur að slaka á kröfunum um fullkomna íslensku. Ég bara spyr er yfirhöfuð einhverjum hjálpað með því? Í fyrsta lagi er varla nokkurstaðar gerð sú krafa lengur allir hafa slakað á virðingunni fyrir tungumálinu. Fyrir hvaða tungumáli sem er, enskan er ílla meðfarin sem og ótal önnur tungumál. Ef bæði innfluttir og innfæddir íslendingar slaka á og missa virðinguna fyrir tungumálinu er komin upp sú staða að það er engin leiðarvísir til um rétt mál og hver og einn talar eftir sínu nefi og engin eins og engin skilur neinn.
Betra er að aðstoða innflutta við tungumálanámið, með því að bjóða upp á ókeypis tungumálanám fyrir alla. Jafnvel á vinnutímanum í vinnuni ef vel á að gera við starfsfólk.
Ég veit að ég er langt frá því að vera fullkomin í stafsetningu og málnotkun en ég geri mitt besta við að vanda mig og afsaka mig aldrei með því að ég sé lesblind, það þarf nefnilega ekki að vera fötlun ef viljinn er fyrir hendi. Ég hef virðingu fyrir tungumálum í heildina og reyni að nota þau öll vel.
Svona áður en þið fáið nóg af röflinu í mér, hlekkurinn uppi bendir á áhugaverða "heimahöfn" mesta hreinræktunarsinna íslenskunnar, sem hann vill kalla Háfrónsku. Merkilegast af öllu er að hann er Belgi sem ekki talar íslensku samkvæmt frétt á Stöð 2 í gær.

allt undir hælinn lagt!

Merkilegt hve litlir og ómerkilegir hlutir megna að hafa mikil áhrif í lífinu. Nú er ég hölt vegna þess að mig verkjar í hælinn, þegar ég skoða hann er eins og það sé eitthvað að reyna að komast út. Líklega agnarlítið glerbrot sem ég hef einhverntímann stigið á, pínulítið og ómerkilegt en ansi sárt.

fimmtudagur, nóvember 24, 2005

Pælingar

nú var ég að spá í að búa til nýja bloggsíðu, sem væri algerlega ókunnug öllum sem ég þekkti, síða sem ég ætti ein, þar gæti ég bullað allt sem mér dytti í hug án þess að spá í það hver myndi lesa síðuna, því hún væri ekki rekjanleg til mín, svo datt ég niður á jörðina, góða mín hvað hefur þú að bulla sem þolir ekki dagsins ljós? og hvernig dettur þér í hug að það sé meiri hvati til að skrifa eitthvað ef enginn les það, því þá ekki að vera með gamaldags dagbók sem engum kemur við, þú hefur nú reynt það ótal sinnum án árangurs. Þá settist ég niður og skrifaði í mitt venjulega blogg.

Ég er farin að halda að skotar vilji slíta öll sín bönd við Ísland, það er eitthvað anti-íslenskt samsæri í gangi hjá skotunum hmm. Það sést best á því að þeir eru gríð og erg að slíta Farice sæstrengin. Ég sannfærðist enn frekar þegar ég sá Moggann í dag, þar segir frá því að menn í greiningardeild The Royal Bank of Scotland hafi gert atlögu að Kaupþingi Banka. Það eina sem allir þessir hlutir eiga sameiginlegt í mínum huga er Linda og hvernig kemur þú inn í þetta alsherjar samsæri vina mín?